गुणरत्न सदावर्ते यांचा आता कोल्हापूरला मुक्काम

मुंबई : प्रतिनिधी
राष्ट्रवादीचे अध्यक्ष शरद पवार यांच्या सिल्व्हर ओक या निवासस्थानावर हल्ला केल्याप्रकरणी अटकेत असलेले ऍड. गुणरत्न सदावर्ते यांचा ताबा आता कोल्हापूर पोलिसांकडे देण्यात आला आहे. सातारा पोलिसांनी चौकशी केल्यानंतर न्यायालयाने त्यांना अधिक पोलीस कोठडी वाढवून न देता त्यांची न्यायालयीन कोठडीत रवानगी करण्यात आली होती. काल त्यांना मुंबईच्या आर्थररोड कारागृहात आणण्यात आले. त्यानंतर काल न्यायालयात सुनावणी झाल्यानंतर त्यांना कोल्हापूर पोलिसांकडे सोपविण्याचा निर्णय न्यायालयाने दिला.मराठा समाजाबद्दल जातीय द्वेष निर्माण केल्याबद्दल कोल्हापूर शाहुपुरीत त्यांच्यावर गुन्हा दाखल झालेला आहे. मुंबई, सातारा,कोल्हापूर, अकोला, बीड या ठिकाणी त्यांच्यावर गुन्हे दाखल करण्यात आलेले आहे. त्यामुळे कोल्हापूरनंतर आता त्यांचा ताबा कुणाकडे दिला जातो, याकडे लक्ष लागले आहे.