सिंहस्थासाठी आरोग्य यंत्रणेचे कवच, 136 ठिकाणी उपचार सुविधा

नाशिक : प्रतिनिधी
सिंहस्थ कुंभमेळ्यात होणारी लाखोंची गर्दी लक्षात घेता आरोग्य यंत्रणा सक्षम करण्यासाठी मोठ्या प्रमाणावर नियोजन करण्यात आले आहे. भाविकांनी उपचारासाठी मुख्य रुग्णालयांकडे धाव घेण्याऐवजी गर्दीच्या ठिकाणीच प्राथमिक व आपत्कालीन वैद्यकीय सेवा मिळावी, यासाठी साधुग्राम, घाट, पार्किंग, होल्डिंग व स्टेजिंग एरिया, तसेच प्रमुख मार्गांवर 136 तात्पुरत्या आरोग्य सुविधा उभारण्यात येणार आहेत. पर्वणीच्या काळात 190 रुग्णवाहिका तैनात राहणार असून, आरोग्य व्यवस्थेसाठी 3,600 अतिरिक्त वैद्यकीय व निमवैद्यकीय मनुष्यबळ उपलब्ध करून दिले जाणार आहे.
महापालिका आरोग्य विभाग, जिल्हा रुग्णालय, जिल्हा परिषद आरोग्य विभाग आणि प्रादेशिक संदर्भ रुग्णालय यांच्या 260 कोटींंच्या आरोग्य आराखड्यांना प्रशासकीय मान्यता देण्यात आली आहे. तात्पुरती रुग्णालये, दवाखाने, आयसीयू, रुग्णवाहिका, औषधे, वैद्यकीय उपकरणे, मनुष्यबळ, रोगनियंत्रण आणि डिजिटल आरोग्य निरीक्षणाचा या आराखड्यात समावेश आहे.
पर्वणीदरम्यान 190 रुग्णवाहिका विविध आरोग्य केंद्रे, रुग्णालये, घाट, साधुग्राम, पार्किंग व प्रमुख मार्गांवर तैनात राहतील. यात अत्यावश्यक, तसेच प्राथमिक जीवनरक्षक सुविधांनी सज्ज रुग्णवाहिकांचा समावेश असेल. याशिवाय गरजेनुसार तीन पोर्टेबल आपत्कालीन वैद्यकीय युनिट्सही तैनात करण्यात येणार आहेत. डॉक्टर, परिचारिका, औषधनिर्माते, वैद्यकीय तंत्रज्ञ आणि अन्य कर्मचार्‍यांसह 3,600 अतिरिक्त मनुष्यबळ उपलब्ध करून दिले जाणार आहे. सिंहस्थापूर्वी या कर्मचार्‍यांना मोठ्या गर्दीतील रुग्ण व्यवस्थापन आणि आपत्कालीन वैद्यकीय सेवांचे प्रशिक्षण देण्यात येणार आहे.

Healthcare safety net for Simhastha; treatment facilities at 136 locations.