शहरात उष्णतेचा चटका

वादळी वार्‍यासह पावसाची शक्यता

नाशिक : प्रतिनिधी
शहरासह जिल्ह्यात उन्हाचा तडाखा दिवसेंदिवस वाढत असून, तापमानाने एप्रिल महिन्यातच चाळीशीचा उंबरठा गाठण्यास सुरुवात केली आहे. 20 एप्रिल रोजी नाशिकमध्ये कमाल तापमान 39.3 अंश सेल्सिअस नोंदविण्यात आले, तर किमान तापमान 21.8 अंश होते. सकाळी वातावरणात 66 टक्के आर्द्रता होती; मात्र सायंकाळपर्यंत ती 33 टक्क्यांपर्यंत घसरल्याने उकाड्यात अधिकच वाढ झाल्याची जाणीव नागरिकांना झाली. सकाळच्या सत्रात 1.8 मिमी पावसाची हलकी नोंद झाली.
उन्हाच्या तीव्रतेमुळे दुपारच्या सुमारास रस्त्यांवर नागरिकांची वर्दळ कमी होत असून, थंड पेये, उसाचा रस, फळांचे ज्यूस यांना मोठी मागणी वाढली आहे. उष्माघाताचा धोका लक्षात घेता नागरिक सावधगिरी बाळगत असल्याचे चित्र शहरात दिसून येत आहे.
दरम्यान, हवामान विभागाने पुढील दोन दिवसांत 21 व 22 एप्रिल रोजी हवामानात बदल होण्याचा अंदाज व्यक्त केला आहे. जिल्ह्यातील तुरळक ठिकाणी विजांच्या कडकडाटासह वादळे, हलका ते मध्यम पाऊस आणि ताशी 30 ते 40 किलोमीटर वेगाने सोसाट्याचा वारा वाहण्याची शक्यता ङ्गअत्यंत संभवफ असल्याचे सांगण्यात आले आहे. काही भागांत मेघगर्जनेसह पावसाच्या सरी कोसळतील, तर काही ठिकाणी वातावरण कोरडे राहण्याची शक्यता असल्याने हवामानात अचानक बदल जाणवू शकतो. विशेषतः दुपारनंतर वातावरणात ढगांची गर्दी होऊन संध्याकाळच्या सुमारास वादळी वार्‍यासह पावसाच्या सरी कोसळण्याची शक्यता व्यक्त केली जात आहे. त्यामुळे शेतकरी, बांधकाम क्षेत्रातील कामगार तसेच नागरिकांनी आवश्यक ती काळजी घेण्याचे आवाहन करण्यात आले आहे. हवामान विभागाने वीज कडकडाटाच्या वेळी उघड्यावर न थांबता सुरक्षित ठिकाणी आसरा घ्यावा, तसेच जोरदार वार्‍यामुळे झाडे किंवा होर्डिंग्जपासून दूर राहावे, असेही आवाहन केले आहे.

अशी घ्यावी खबरदारी
दुपारच्या तीव्र उन्हात बाहेर पडणे टाळावे
भरपूर पाणी व द्रवपदार्थांचे सेवन करावे
वीज कडकडाटाच्या वेळी झाडाखाली उभे राहू नये.
जोरदार वार्‍याच्या वेळी सैल वस्तू व सुरक्षितता तपासावी.
शेतकर्‍यांनी पिकांचे संरक्षण करण्यासाठी उपाययोजना कराव्यात.

Heatwave in the city