पिळकोसजवळ भीषण अपघात

नवापूर तालुक्यातील दाम्पत्याचा मृत्यू

खामखेडा : वार्ताहर
कळवण तालुक्यातील पिळकोस येथील राज्य महामार्ग क्रमांक 17 वर लांडू ओहळाजवळ रविवारी (दि. 26) सकाळी मॅक्झिमो वाहनाने दुचाकीला धडक दिल्याने झालेल्या भीषण अपघातात नवापूर तालुक्यातील बिलबारा येथील दिनेश करणसिंग गावित व त्यांची पत्नी कीर्ती गावित यांचा मृत्यू झाला. तर कीर्ती गावित यांची लहान बहीण गंभीर जखमी असून, तिच्यावर उपचार सुरू आहेत. भरधाव मॅक्झिमो चालकाचा तीव्र वळणावर ताबा सुटल्याने समोरून येणार्‍या दुचाकीला जोरदार धडक बसली. अपघातात दुचाकीचा चक्काचूर झाला. धडकेनंतर दोन्ही महिला रस्त्यालगतच्या वाहत्या ओहळात फेकल्या गेल्या, तर दिनेश गावित दूर जाऊन पडले.
अपघाताचा आवाज ऐकून ग्रामस्थ व शेतकरी घटनास्थळी धावले. सामाजिक कार्यकर्त्यांनी मुसळधार पावसात ओहळात उतरून जखमींना बाहेर काढून रुग्णवाहिकेतून कळवण ग्रामीण उपजिल्हा रुग्णालयात दाखल केले. प्रकृती गंभीर असल्याने तिघांना नाशिकला हलविण्यात आले; मात्र वाटेतच दिनेश व कीर्ती गावित यांचा मृत्यू झाला. कळवण पोलिसांनी घटनास्थळी पंचनामा करून पुढील तपास सुरू केला.

Horrific accident near Pilkos