अमेरिकेचे इराणवर तीव्र हल्ले

पस्तीस ठार, तीनशे जखमी

वॉशिंग्टन/तेहरान :
अमेरिकेच्या लष्कराने इराणवरील हल्ल्यांची तीव्रता वाढवली आहे. प्रथमच राजधानी तेहरानजवळील आणि देशाच्या उत्तरेकडील लष्करी ठिकाणांना लक्ष्य केले आहे. अमेरिकेच्या ’सेंटकॉम’च्या माहितीनुसार, होर्मुझच्या सामुद्रधुनीमध्ये इराणने तीन व्यापारी जहाजांवर केलेल्या हल्ल्यांना प्रत्युत्तर म्हणून आणि त्यांची नौदल क्षमता कमी करण्यासाठी ही कारवाई करण्यात आली. या ताज्या बॉम्बहल्ल्यांमध्ये इराणची कमांड सेंटर्स, हवाई संरक्षण स्थळे आणि क्रूझ क्षेपणास्त्र तळ उद्ध्व्वस्त करण्यात आले आहे. यात आतापर्यंत किमान 35 जणांचा मृत्यू आणि 300 हून अधिक लोक जखमी झाले आहेत. याशिवाय, अमेरिकेने नव्याने लागू केलेल्या नौदल नाकेबंदीअंतर्गत खर्ग बेटाकडे जाणारे एक इराणी तेलवाहू जहाजही क्षेपणास्त्राद्वारे निकामी केले आहे.अमेरिकेच्या या आक्रमक कारवाईला इराणनेही जोरदार उत्तर दिले असून, शेजारील आखाती देशांमधील अमेरिकन लष्करी मालमत्तेला लक्ष्य केले आहे. इराणच्या लष्कराने दिलेल्या माहितीनुसार, त्यांनी कुवेतमधील ’अली अल सालेम’ आणि बहरीनमधील ’शेख ईसा’ हवाई तळांवरील अमेरिकेच्या रडार यंत्रणा आणि ’पॅट्रियट’ संरक्षण प्रणालींवर ड्रोन आणि क्षेपणास्त्र हल्ले केले आहेत. या वाढत्या प्रादेशिक संघर्षात जॉर्डननेही इराणची आठ क्षेपणास्त्रे रोखल्याचे जाहीर केले आहे; तर दुसरीकडे, इराकमधील एरबिल शहरात अमेरिकन वाणिज्य दूतावासाजवळही ड्रोन हल्ले झाल्याचे समोर आले आहे, ज्यामुळे पश्चिम आशियातील युद्ध भडकण्याची शक्यता वाढली आहे.

तेल निर्यातीबाबत इराणची धमकी

या तणावपूर्ण वातावरणात इराणच्या ’आयआरजीसी’ने अमेरिकेच्या नौदल नाकेबंदीला विरोध करत, मध्यपूर्वेतून होणारी सर्व तेल आणि वायूची निर्यात रोखण्याची गंभीर धमकी दिली आहे. इराणचे प्रमुख वाटाघाटीकार मोहम्मद गालिबाफ यांनी हा संघर्ष म्हणजे ’अस्तित्वाची लढाई’ असल्याचे सांगत देश मोठ्या युद्धासाठी तयार असल्याचा इशारा दिला आहे. मात्र दुसरीकडे, अमेरिकेचे अध्यक्ष डोनाल्ड ट्रम्प यांनी दावा केला आहे की इराण पडद्यामागे शांतता करारासाठी प्रयत्न करत आहे. ट्रम्प यांनी अमेरिकन नागरिक देना करारी यांच्या सुटकेबद्दल इराणचे आभारही मानले आहेत. तसेच अमेरिकेचे उपराष्ट्रपती जेडी व्हान्स यांनी युद्धाचे समर्थन करतानाच, हा संघर्ष थांबवण्यासाठी अंतिमतः एका कराराची आवश्यकता असल्याचे स्पष्ट केले आहे.

Intense US attacks on Iran

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.