जगन्नाथ रथयात्रेत चेंगराचेंगरीत एका भाविकाचा मृत्यू

भुवनेश्वर : प्रतिनिधी
ओडिशातील प्रसिद्ध जगन्नाथपुरी रथयात्रेदरम्यान एक मोठी दुर्दैवी घटना घडली आहे. भाविकांच्या प्रचंड गर्दीमुळे अचानक चेंगराचेंगरीसारखी परिस्थिती निर्माण होऊन एका भाविकाचा मृत्यू झाला आहे, तर सुमारे 120 जण जखमी झाले आहेत. भगवान जगन्नाथ, बलभद्र आणि सुभद्रा यांच्या रथांचे दर्शन घेण्यासाठी आणि रथ ओढण्यासाठी देशभरातून लाखो भाविक पुरी येथे दाखल झाले असताना, या प्रचंड जनसागरामुळे हा भीषण प्रकार घडला.
रथयात्रेच्या मार्गावर क्षमतेपेक्षा अधिक गर्दी झाल्यामुळे अनेक भाविकांना श्वास घेण्यास त्रास होऊ लागला आणि गोंधळ उडाला. यातूनच चेंगराचेंगरी आणि धावाधाव माजल्याने परिस्थिती हाताबाहेर गेली. या घटनेत जखमी झालेल्या आणि गुदमरून बेशुद्ध पडलेल्या सुमारे 120 भाविकांना तातडीने पुरी येथील स्थानिक रुग्णालयांमध्ये उपचारांसाठी दाखल करण्यात आले आहे. स्थानिक प्रशासन आणि वैद्यकीय पथकांकडून जखमींवर युद्धपातळीवर उपचार सुरू आहेत. डॉक्टरांच्या देखरेखीखाली त्यांना सर्व आवश्यक वैद्यकीय मदत पुरवली जात आहे. या घटनेनंतर पोलीस आणि स्थानिक प्रशासनाने तातडीने पावले उचलत परिस्थिती नियंत्रणात आणली आहे. आपत्कालीन पथकांच्या मदतीने भाविकांना सुरक्षितपणे बाहेर काढण्यात आले असून, गर्दीचे योग्य व्यवस्थापन करण्यासाठी अतिरिक्त सुरक्षा दल तैनात करण्यात आले आहे.

One devotee dies in a stampede during the Jagannath Rath Yatra.