जिंगल बेल जिंगल बेल जिंगल ऑल द वे…

शहरातील चर्च सजले; आज ख्रिस्त बांधवांची प्रार्थना

नाशिक : माधुरी पोटकुळे
नाताळनिमित्त शहरात मोठ्या प्रमाणात तयारी आहे. नाताळच्या पूर्वसंध्येला चर्च परिसरात उत्साहाचे वातावरण पाहायला मिळाले. रंगीबेरंगी दिवे, रोषणाई, ख्रिसमस ट्री, फुलांची सजावट व आकर्षक देखावे यामुळे चर्चचा परिसर उजळून निघाला आहे.
ख्रिसमस अर्थात, नाताळ सणाच्या पाश्वर्र्भूमीवर नाशिक शहरातील सर्व चर्च आकर्षक सजावटीने सजले आहेत. शहरात ख्रिश्चन समाजाची मोठ्या प्रमाणात वस्ती आहे. दरवर्षीप्रमाणे यंदाही नाताळ सण मोठ्या उत्साहात साजरा करण्यासाठी चर्चमध्ये विशेष तयारी करण्यात आली आहे. गेल्या काही दिवसांपासून चर्चची स्वच्छता, सजावट आणि धार्मिक कार्यक्रमांच्या आयोजनात संबंधित व्यस्त होते. चर्चच्या प्रवेशद्वारापासून ते मुख्य प्रार्थना सभागृहापर्यंत रंगीत दिव्यांची सजावट करण्यात आली आहे. काही चर्चमध्ये विद्युत रोषणाईमुळे संपूर्ण परिसर आकर्षक दिसत
आहे.
या चर्चमध्ये विशेष प्रार्थना सभा, कॅरोल गायन, धार्मिक प्रवचने आणि सांस्कृतिक कार्यक्रमांचे आयोजन करण्यात आले आहे. बालकांसाठी खास कार्यक्रम ठेवण्यात आले असून, यामध्ये ख्रिसमस गाणी, नाट्यप्रयोग आणि बायबलवरील कथा सादर केल्या जाणार आहेत. यामुळे लहान मुलांमध्येही नाताळ सणाबद्दल उत्सुकता आणि आनंद दिसून येत आहे.

बाजारातही उत्साह

नाताळ सणाच्या निमित्ताने नाशिक शहरातील बाजारपेठेतही चैतन्य निर्माण झाले आहे. ख्रिसमस ट्री, सजावटीचे दिवे, तारे, सांताक्लॉजचे मुखवटे, केक, विविध मिठाई आणि भेटवस्तूंची खरेदी मोठ्या प्रमाणात होत आहे. केकची दुकाने आणि बेकर्‍यांमध्ये ग्राहकांची गर्दी वाढली आहे. नागरिक आपल्या कुटुंबीयांसह खरेदीसाठी बाहेर पडताना दिसत होते.

Jingle bell jingle bell jingle all the way...