काँग्रेसचे ज्येष्ठ नेते सुरुपसिंग नाईक यांचे निधन

नंदुरबार :
जिल्ह्याचे ज्येष्ठ नेते सुरुपसिंग नाईक यांचे वृद्धापकाळाने निधन झाले. नंदुरबार जिल्ह्यात अनेक वर्षांपासून त्यांनी काँग्रेसची धुरा सांभाळली होती. त्यांच्यावर गेल्या काही दिवसांपासून मुंबई, बारडोली (गुजरात) आणि नंतर नवापूरमधील एका खासगी रुग्णालयात उपचार सुरू होते. उपचारादरम्यान त्यांचे निधन झाले. सन 1962 मध्ये सुरुपसिंग नाईकांनी यांनी नवापूर तालुक्यातील ग्रामपंचायतीच्या सरपंचपदापासून राजकीय प्रवासाला सुरुवात केली. 1965 साली ते धुळे जिल्हा परिषदेत सदस्य म्हणून निवडून आले. 1972 साली नवापूर विधानसभा मतदारसंघातून मोठ्या मताधिक्क्याने निवडून आले. आणीबाणीच्या काळात त्यांच्या कार्याचा गौरव म्हणून मार्च 1977 साली प्रथमच नंदुरबार लोकसभा मतदारसंघातून काँग्रेस पक्षाचे तिकीट मिळाले. 1980 साली त्यांचा मोठ्या मताधिक्क्याने विजय झाला आणि ते लोकसभेत पोहोचले. त्यांनी नंतर राजीनामा दिला आणि दि. 25 सप्टेंबर 1980 रोजी महाराष्ट्र राज्यात कॅबिनेट मंत्री म्हणून काम करण्याची संधी त्यांना देण्यात आली.