विद्यार्थ्यांवर लाठीहल्ल्याचे संसदेत पडसाद

शिक्षणमंत्र्यांच्या राजीनाम्याची मागणी

नवी दिल्ली : प्रतिनिधी
नीट परीक्षेतील कथित अनियमितता आणि पेपरफुटीमुळे देशभरात आंदोलने सुरू झाली आहेत. या वादाचे पडसाद आता संसदेच्या पावसाळी अधिवेशनात स्पष्टपणे दिसून येत आहेत. दिल्लीत आंदोलन करणार्‍या विद्यार्थ्यांवर पोलिसांनी केलेल्या लाठीचार्जनंतर, विरोधी खासदारांनी संसदेच्या दोन्ही सभागृहांमध्ये मोठा गदारोळ केला आणि केंद्रीय शिक्षणमंत्री धर्मेंद्र प्रधान यांच्या राजीनाम्याची
मागणी केली.
संसदेचे अधिवेशन सुरू होताच विरोधी खासदारांनी नीट पेपरफुटी आणि दिल्लीत विद्यार्थ्यांवर झालेल्या पोलीस लाठीचार्जचा मुद्दा उपस्थित केला. विरोधी नेते फलक आणि बॅनर्स घेऊन सभागृहाच्या मध्यभागी आले आणि त्यांनी सरकारविरोधी घोषणाबाजी केली. सरकार देशातील लाखो तरुणांच्या भविष्याशी खेळत असल्याचा आरोप विरोधी पक्षांनी केला. सततच्या गदारोळामुळे आणि घोषणाबाजीमुळे सभागृहाच्या अध्यक्षांना संसदेचे अधिवेशन वारंवार तहकूब करावे लागले.
जंतर-मंतरवर आणि दिल्लीच्या रस्त्यांवर शांततेने आंदोलन करणार्‍या विद्यार्थ्यांवर आणि युवा संघटनांवर पोलिसांनी केलेल्या बळाचा वापर आणि लाठीचार्जचे व्हिडिओ व्हायरल झाल्यानंतर विरोधी पक्ष अधिक आक्रमक झाला आहे. विरोधी नेत्यांनी विद्यार्थ्यांवर अत्याचार करणार्‍या पोलीस अधिकार्‍यांवर कठोर कारवाई करण्याची आणि पेपरफुटीची
सर्वोच्च न्यायालयाच्या देखरेखीखाली स्वतंत्र चौकशी करण्याची मागणी केली आहे. दुसरीकडे, सरकारच्या वतीने मंत्र्यांनी स्पष्ट केले आहे की, ते संसदेत या विषयावर चर्चा करण्यास तयार आहेत आणि राष्ट्रीय चाचणी संस्थेत (एनटीए) सुधारणा करण्यासाठी एक उच्चस्तरीय समिती स्थापन करण्यात आली आहे. मात्र, शिक्षणमंत्र्यांच्या राजीनाम्याशिवाय सभागृहाचे कामकाज पुढे चालणार नाही, यावर विरोधी आघाडी ‘इंडिया’चे नेते ठाम आहेत, त्यामुळे दिल्लीतील राजकीय वातावरण अत्यंत तापले आहे.

Lathi-charge on students echoes in Parliament.