मालगाडीच्या धडकेत मॅजिक कारचा चक्काचूर

रेल्वे क्रॉसिंग गेटवर अपघात; सुदैवाने जीवितहानी टळली

मनमाड : प्रतिनिधी
मनमाड शहरातील गर्डरशॉप भागात गुरुवारी सकाळी भीषण अपघात घडला. एफसीआयच्या गोदामाकडे धान्य घेऊन जाणार्‍या रेल्वे मालगाडीने रुळावर बंद पडलेल्या काळी-पिवळी मॅजिक गाडीला जोरदार धडक दिली. या धडकेत मॅजिक कारचा अक्षरशः चेंदामेंदा झाला असून, सुदैवाने गाडीतील प्रवासी वेळीच बाहेर पडल्याने
अनर्थ टळला.
शहराच्या मध्यभागी असलेल्या भारतीय अन्न महामंडळाच्या (एफसीआय) गोदामात रेल्वेने धान्याचा पुरवठा केला जातो. या रेल्वे रुळाच्या दोन्ही बाजूंना दाट लोकवस्ती असल्याने नागरिकांना आणि वाहनांना ये-जा करण्यासाठी हा रूळ ओलांडून जावे लागते. गुरुवारी सकाळी मॅजिक कार या अनधिकृत क्रॉसिंगवरून जात असताना अचानक रुळावरच बंद पडली. त्याच वेळी समोरून मालगाडी येत असल्याचे चालकाच्या निदर्शनास आले. मालगाडी जवळ येत असल्याचे पाहून मॅजिकमधील सर्व प्रवासी तातडीने खाली उतरले आणि दूर पळाले. काही क्षणांतच भरधाव मालगाडीने मॅजिकला भीषण धडक दिली. ही धडक इतकी जोरदार होती की, मॅजिक कार लांब फेकली जाऊन तिचा पूर्णतः चक्काचूर झाला. प्रवाशांनी दाखवलेल्या तत्परतेमुळे या घटनेत कोणालाही इजा झाली नाही. या घटनेनंतर परिसरात खळबळ उडाली असून, स्थानिक नागरिकांनी रेल्वे प्रशासनाकडे या ठिकाणी अधिकृत गेट (फाटक) बसवण्याची मागणी केली आहे. रेल्वे प्रशासनाने या प्रकरणाचा तपास सुरू केला आहे.

रेल्वेने क्रॉसिंग गेट लावण्याची मागणी…!

मनमाड शहरातील एफसीआयकडे जाणारा रेल्वेमार्ग आहे, हा मार्ग शहराच्या मध्य भागातून जातो. याशिवाय, हा रस्ता शहरानजीक असलेल्या ग्रामीण भागालादेखील जोडला जातो. या रस्त्याने ग्रामीण भागातील नागरिक व शालेय विद्यार्थीदेखील ये-जा करतात. त्यामुळे या रस्त्यावर मोठ्या प्रमाणावर वर्दळ असते. रेल्वेच्या मालवाहतूक करणार्‍या गाड्या जातात. त्यामुळे या ठिकाणी रेल्वेने क्रॉसिंग गेट लावावा, अशी मागणी सर्वसामान्य जनतेकडून करण्यात येत आहे.

Magic car smashed in freight train collision

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.