भांडण सोडविण्यासाठी गेलेल्या युवकाचा खून

दिंडोरी : प्रतिनिधी
रुमसमोर लघुशंका केल्याचा जाब विचारत असताना दोघांमध्येे झालेले भांडण सोडविण्यासाठी गेलेल्या युवकाचा चाकूने भोसकून खून करण्यात आल्याची घटना उघडकीस आली आहे. याप्रकरणी संशयिताविरोधात दिंडोरी पोलिसांनी खुनाचा गुन्हा दाखल केला आहे. रविवारी रात्री 9 वाजेच्या सुमारास ही घटना घडली.
याबाबत पोलिसांनी दिलेल्या माहितीनुसार, सोईराकुमार रामप्रवेश रिकीयासन (29, रा. सुलपुरा, पो. दुग्गल, बिहार) हल्ली रा. अक्राळे एमआयडीसी. यास राजकुमार बैजनाथ बियार, रा. सिकणी, पो. बंका, ता. पदुआ, जि. गढवाल, राज्य झारखंड) हा म्हणाला की. तू रुमसमोर लघुशंका करतो या कारणावरुन कुरापत काढून हातातील धारधार चाकूने सोईराकुमार याच्या डाव्या हाताच्या मनगटावर वार करुन जखमी केले.
हे भांडण योगेश विश्‍वेश्‍वर रीकीयासन (रा. बिहार) हा सोडविण्यासाठी गेला असता राजकुमार याने योगेशवरही वार केले. त्यात योगेशचा मृत्यू झाला. घटनेची माहिती मिळताच कळवण उपविभागीय अधिकारी पुष्कराज सूर्यवंशी, पोलीस निरीक्षक पंढरीनाथ ढोकणे, पोलीस उपनिरीक्षक पी. बी. कावळे, अमोल पवार व ढोकरे यांनी घटनास्थळी भेट दिली. दरम्यान संशयित राजकुमार यास अटक करण्यात आली असून खुनात वापरलेला चाकू जप्त करण्यात आला आहे.