15 ऑगस्टपासून खतांची ऑनलाइन बुकिंग

घरबसल्या स्थानिक कृषी सेवा केंद्रांतील उपलब्ध साठा पाहून शेतकर्‍यास करता येणार बुकिंग

नाशिक, लासलगाव : प्रतिनिधी
शेतकर्‍यांना रासायनिक खतांची उपलब्धता अधिक सुलभ करण्यासाठी कृषी विभागाने महत्त्वाचा निर्णय घेतला असून, 15 ऑगस्टपासून नाशिकसह राज्यातील 12 जिल्ह्यांत खतांची ऑनलाइन बुकिंग सुविधा सुरू होणार आहे.
या सुविधेमुळे शेतकरी मोबाइल अ‍ॅपच्या माध्यमातून जवळच्या कृषी सेवा केंद्रांमधील खतांचा उपलब्ध साठा पाहून थेट बुकिंग करू शकतील. ऑनलाइन बुकिंग केल्यानंतर संबंधित विक्रेत्याने तीन दिवस खताचा साठा राखून ठेवणे बंधनकारक असेल. शेतकर्‍यांनी निर्धारित कालावधीत केंद्रावर जाऊन पैसे भरून खताचा ताबा घ्यावा लागेल. कृषी विभागाच्या माहितीनुसार, ही योजना प्रायोगिक तत्त्वावर यशस्वी ठरल्यानंतर नाशिक, पालघर, ठाणे, रायगड, रत्नागिरी, सिंधुदुर्ग, अहमदनगर, लातूर, धाराशिव आणि गडचिरोलीसह एकूण 12 जिल्ह्यांत लागू करण्यात येत आहे. जिल्ह्यातील लाखो शेतकर्‍यांना याचा लाभ होणार असून, खतांचा तुटवडा, अनावश्यक गर्दी तसेच काळाबाजार रोखण्यास या व्यवस्थेची मदत होईल, असा विश्वास कृषी विभागाने व्यक्त केला आहे. जिल्ह्यातील सर्व शेतकरी बांधवांनी आणि संबंधित घटकांनी या डिजिटल उपक्रमात सक्रिय सहभाग नोंदवावा, असे आवाहन जिल्हा अधीक्षक कृषी अधिकारी, रवींद्र माने यांनी केले.

अशी असेल प्रक्रिया….

मोबाइल अ‍ॅपवर नोंदणी करून लॉगिन करावे. जवळील कृषी सेवा केंद्र व उपलब्ध खतांचा साठा पाहावा. आवश्यक खताची ऑनलाइन बुकिंग करावी. बुकिंगनंतर तीन दिवसांत केंद्रावर जाऊन पैसे भरून खताचा ताबा घ्यावा.

रासायनिक खतांचा होणारा काळाबाजार रोखण्यासाठी शासनाने हे अभिनंदनीय पाऊल उचलले आहे, मात्र, ऑनलाइन बुकिंगनंतरही खते उचलताना दुकानदार वाढीव रक्कम मागू शकतो, त्यामुळे ऑनलाइन बुकिंगसोबतच ऑनलाइन पेमेंटची सुविधा उपलब्ध व्हावी.
-प्रकाश पाटील, माजी सदस्य, पंचायत समिती