राज ठाकरे आज नाशकात

नाशिक : प्रतिनिधी
नाशकातील खड्ड्यांच्या गंभीर समस्येमुळे नागरिक त्रस्त असताना मनसेचे अध्यक्ष राज ठाकरे यांनीही या प्रश्नात लक्ष घातले आहे. गुरुवार (दि. 6) व शुक्रवारी (दि. 7 ऑगस्ट) दोन दिवसीय नाशिक दौर्‍यावर येत असून, खड्ड्यांच्या प्रश्नावर प्रशासनाबाबत ते काय भूमिका मांडतात, याकडे नागरिकांचे लक्ष लागले आहे.
नाशिकमधील खड्ड्यांचा मुद्दा सध्या सोशल मीडियावरही मोठ्या प्रमाणात चर्चेत आहे. विविध राजकीय पक्षांनी आंदोलने करून प्रशासनाचे लक्ष वेधण्याचा प्रयत्न केला आहे. काही दिवसांपूर्वी अन्न व नागरी पुरवठा मंत्री छगन भुजबळ यांनीही नागरिकांचा अंत पाहू नका, रस्त्यांवरील खड्डे तातडीने बुजवा, अशी प्रशासनाला सूचना केली होती. त्यानंतर आता राज ठाकरे यांच्या दौर्‍यामुळे या प्रश्नाला अधिक राजकीय महत्त्व प्राप्त झाले आहे.
दौर्‍यादरम्यान राज ठाकरे मनसेच्या शहर व ग्रामीण संघटनांच्या पदाधिकार्‍यांच्या बैठका घेणार असून, आगामी महापालिका निवडणुकीच्या तयारीचाही आढावा घेणार आहेत. गुरुवारी सकाळी मुंबई नाका येथे त्यांचे जंगी स्वागत करण्यात येणार आहे. त्यानंतर शाखाध्यक्ष, नाशिक ग्रामीणमधील 15 तालुक्यांची संयुक्त बैठक घेणार आहेत. शुक्रवारी सकाळी तरुणांचा मनसेमध्ये पक्षप्रवेश कार्यक्रम आयोजित करण्यात आला असून, त्यानंतर राज ठाकरे पत्रकार परिषद
घेणार आहेत.

Raj Thackeray in Nashik today.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.