सर्व पक्षांसाठी ‘रेडिमेड’ प्रचार साहित्य बाजारात उपलब्ध

नाशिक : वैशाली लिलके

राज्यात महानगरपालिका निवडणुका जाहीर होण्यापूर्वीच सर्व पक्षांनी तयारीला वेग दिला होता. आता प्रत्यक्ष निवडणूक प्रक्रिया सुरू झाली आहे. त्यामुळे प्रचार साहित्याची मागणी मोठ्या प्रमाणात वाढली आहे. यामुळे शहरातील प्रचार साहित्य विक्री केंद्रे गजबजून गेली आहेत.

झेंडे, बॅनर, कटआउट, बॅज, टोपी, स्कार्फ, टी-शर्ट अशा विविध प्रचार साहित्याने बाजार सजला आहे. महापालिकेच्या निवडणुका या स्थानिक स्वराज्य संस्थांशी संबंधित असल्याने कार्यकर्ते, उमेदवार आणि पक्ष पदाधिकारी मोठ्या उत्साहात कामाला लागले आहेत. प्रत्येक प्रभागात आपली ओळख निर्माण करण्यासाठी आणि मतदारांपर्यंत पोहोचण्यासाठी प्रचार साहित्याचा मोठ्या प्रमाणात वापर केला जातो.

शहरातील मुख्य बाजारपेठा तसेच राजकीय प्रचारसाहित्य विकणारी खास दुकाने सध्या गर्दीने भरलेली दिसत आहेत. सकाळपासून रात्री उशिरापर्यंत दुकाने सुरू असून कार्यकर्त्यांची ये-जा सुरू आहे. वेगवेगळ्या पक्षांचे झेंडे, चिन्हे आणि रंगांनी संपूर्ण बाजारपेठ रंगून गेली आहे.
विविध पक्षांचे साहित्य उपलब्ध
नगरपालिकेच्या निवडणुकीत विविध राष्ट्रीय व स्थानिक पक्ष रिंगणात उतरले आहेत. त्यामुळे भाजप, काँग्रेस, शिवसेना, राष्ट्रवादी काँग्रेस, तसेच इतर पक्षांचे झेंडे, फलक आणि प्रचार साहित्य सहज उपलब्ध झाले आहे.
प्रत्येक पक्ष आपली ओळख ठळकपणे मांडण्यासाठी वेगवेगळ्या प्रकारच्या साहित्याचा वापर करत आहे. निवडणूक प्रचारासाठी वापरले जाणारे साहित्य विविध प्रकारचे आहे. काही उमेदवारांकडून खास डिझाइनचे बॅनर आणि टी-शर्ट तयार करून घेतले जात आहेत. यामुळे छपाई व्यवसायालाही चालना मिळाली आहे.

झेंडे : 2 ते 100 रुपये
टोपी : 5 ते 50 रुपये
बॅनर : 10 ते 100 रुपये
कटाउट : 10 ते 200 रुपये
टी-शर्ट : 50 ते 200 रुपये
बॅज : 2 ते 10 रुपये
स्कार्फ : 3 ते 5 रुपये

उमेदवारांची धावपळ
निवडणुकीचे मतदान जवळ आल्याने इच्छुक उमेदवारांची लगबग वाढली आहे. प्रभागात आपली ओळख निर्माण करण्यासाठी प्रचार साहित्य महत्त्वाचे मानले जाते. त्यामुळे उमेदवार आणि त्यांचे समर्थक मोठ्या प्रमाणात ऑर्डर देत आहेत. प्रचार साहित्य वेळेत मिळावे यासाठी विक्रेत्यांवरही कामाचा ताण वाढला आहे. निवडणूक काळ हा त्यांच्यासाठी सर्वांत महत्त्वाचा असतो. या काळात साहित्याच्या विक्रीत मोठी वाढ होते. झेंडे आणि बॅनरची सर्वाधिक मागणी असून, लहान साहित्यही चांगल्या प्रमाणात विकले जात आहे. निवडणुकीमुळे स्थानिक बाजारपेठेला चालना मिळत असल्याचे दृश्य दिसत आहे. बॅनर छपाई, फ्लेक्स लावणे, वाहन सजावट व साहित्य वाहतूक यासाठी मजुरांची गरज लागते.

'Ready-made' campaign materials for all parties available in the market

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.