दहशतवाद्यांशी संबंध आणि मनी लाँड्रिंगची भीती दाखवून 71 लाखांची फसवणूक

सिडको : प्रतिनिधी
काश्मीरमधील एका प्रकरणात दोन दहशतवाद्यांना अटक करण्यात आली असून, त्यांच्याकडे तक्रारदाराचे आधारकार्ड आढळल्याचा बनाव करून सायबर भामट्यांनी एका व्यक्तीची 71 लाख रुपयांची फसवणूक केली. या प्रकरणी नाशिक शहर सायबर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदाराशी मोबाइल फोन, व्हॉट्सअ‍ॅप आणि सिग्नल अ‍ॅपच्या माध्यमातून संपर्क साधण्यात आला. सीमा रॉय, विक्रम सिंग आणि राकेश अग्रवाल अशी नावे सांगणार्‍या व्यक्तींनी तक्रारदाराला संपर्क केला.
काश्मीरमधील जेके 9527 या प्रकरणात दोन दहशतवाद्यांना अटक करण्यात आली असून, त्यांच्याकडे तक्रारदाराचे आधारकार्ड सापडले आहे. या आधारकार्डचा वापर करून तक्रारदाराच्या नावाने एचडीएफसी बँकेत खाते उघडण्यात आले असून, त्यातून 70 कोटी रुपयांचे मनी लाँड्रिंग झाल्याचे भामट्यांनी सांगितले. या प्रकरणात तक्रारदाराची संपत्ती जप्त केली जाईल आणि त्यांना अटक होऊ शकते, अशी भीती दाखविण्यात आली. त्यानंतर तक्रारदाराकडे असलेल्या पैशांची चौकशी करण्याच्या बहाण्याने त्यांना वेगवेगळ्या बँक खात्यांमध्ये पैसे जमा करण्यास सांगण्यात आले. आरोपींच्या सांगण्यावरून तक्रारदाराने एकूण 71 लाख रुपये विविध खात्यांमध्ये जमा केले. मात्र, हा प्रकार फसवणुकीचा असल्याचे लक्षात आल्यानंतर प्रकरण पोलिसांपर्यंत पोहोचले.
या प्रकरणी गुन्हा दाखल करण्यात आला आहे. सायबर पोलीस ठाण्याच्या वरिष्ठ पोलीस निरीक्षक सुशीला कोल्हे यांच्या कार्यक्षेत्रात या प्रकरणाचा तपास सुरू आहे. दरम्यान, अनोळखी व्यक्तींकडून पोलीस, तपास यंत्रणा किंवा बँक अधिकारी असल्याचे सांगून पैशांची मागणी झाल्यास नागरिकांनी सावध राहावे. भीती दाखवून किंवा चौकशीच्या नावाखाली कोणत्याही अनोळखी बँक खात्यात पैसे जमा करू नयेत, असे आवाहन पोलिसांकडून करण्यात येते.

Rs 71 lakh swindled by creating fear of links to terrorists and money laundering