दसवेल गावाजवळ डंपर- कंटेनरची भीषण धडक

सटाणा : प्रतिनिधी
तालुक्यातील दसवेल गावाजवळ साक्री-शिर्डी राष्ट्रीय महामार्गावर भीषण अपघात झाला. वाळूचा डंपर आणि कंटेनर यांच्यात समोरासमोर जोरदार धडक होऊन एका चालकाचा जागीच मृत्यू झाला, तर दुसरा चालक गंभीर जखमी झाला आहे. जखमी चालकावर ताहाराबाद येथील खासगी रुग्णालयात उपचार सुरू आहेत.
मिळालेल्या माहितीनुसार, वाळूचा डंपर (क्र. 15 9293) हा ताहाराबादकडून पिंपळनेरकडे जात होता. त्याचवेळी कंटेनर (क्र. 50 8342) हा पिंपळनेरकडून ताहाराबादकडे येत असताना दसवेल गावाजवळ दोन्ही वाहनांची समोरासमोर जोरदार टक्कर झाली. या अपघातात डंपरचालक किसन सोमनाथ मुंडे (वय 45, रा. नाशिक) यांचा जागीच मृत्यू झाला. घटनेची माहिती मिळताच पोलीसपाटील रवींद्र निकम यांनी जायखेडा पोलीस स्टेशनचे सहाय्यक पोलीस निरीक्षक सागर काळे यांना कळविले. त्यानंतर हवालदार रामराव शेरे, दिनेश जाधव, अरुण वणसे आणि राकेश काळे यांनी घटनास्थळी धाव घेऊन वाहतूक सुरळीत करत पंचनामा केला. मृत चालकाचा मृतदेह शवविच्छेदनासाठी नामपूर ग्रामीण रुग्णालयात पाठविण्यात आला आहे.

Terrible collision between dumper and container near Dasvel village