ग्रंथ निघाले ब्रिस्बेनला

ब्रिस्बेन , ऑस्ट्रेलिया येथे २१ ग्रंथपेट्या रवाना

नाशिक : प्रतिनिधी कुसुमाग्रज प्रतिष्ठानच्या ‘ ग्रंथ तुमच्या दारी ‘ या दर्जेदार मराठी ग्रंथसंपदा वाचनासाठी उपलब्ध करून देणाऱ्या वाचकप्रिय योजनेमुळे अडीच कोटींपेक्षा जास्त रुपयांची पुस्तके वाचनासाठी भारत आणि भारताबाहेर १५ देशांत फिरत्या ग्रंथपेट्यांच्या स्वरूपात आहेत . ब्रिस्बेन , ऑस्ट्रेलिया येथे वास्तव्यास असलेले पण मूळचे भारतीय असलेले श्रुती- तुषार काळवीट हे दाम्पत्य मागच्याच महिन्यात कुसुमाग्रज स्मारक , नाशिक येथे ‘ ग्रंथ तुमच्या दारी ‘ योजनेचे प्रवर्तक विनायक रानडे यांची भेट घेण्यासाठी आले होते . ब्रिस्बेन येथील मराठी साहित्यावर निस्सीम प्रेम करणाऱ्या वाचकांना पुस्तके उपलब्ध व्हावीत म्हणून त्यांनी पुढाकार घेतला आणि बघता बघता ब्रिस्बेन येथील १६ वाचक कुटुंबांनी देणगीरूपाने आर्थिक पाठबळ देऊन सक्रिय सहभाग नोंदवला . त्यामुळे श्रुती काळवीट , समन्वयक ब्रिस्बेन यांच्या पुढाक २१ ग्रंथपेट्या ब्रिस्बेन , ऑस्ट्रेलिया येथे रवाना होत आहेत . तसेच अंजली घुर्ये यांच्या ‘ ओ झेड किराणा ‘ या उद्योग समूहाद्वारे ग्रंथपेट्या ब्रिस्बेन येथे त्यांच्या कंटेनरमधून नेण्यासाठी सहकार्य केल्याने वायुमार्गाने ग्रंथपेट्या पाठवण्याच्या खर्चात बचत होणार आहे . २१ ग्रंथपेट्यांनी ब्रिस्बेन येथे ग्रंथ तुमच्या दारी ‘ योजनेचा शुभारंभ होत आहे . एका ग्रंथपेटीत २५ पुस्तके आहेत . प्रत्येक पेटीतील पुस्तके वेगळी असतात . विविध भागात या पेट्या वाचक कुटुंबाला तीन महिन्यांसाठी उपलब्ध होतात . दर ३ महिन्यांनी पेट्या परस्परांमध्ये बदलत्या ठेवल्यामुळे सर्वांना मोठ्या प्रमाणात दर्जेदार मराठी ग्रंथसंपदा वाचनासाठी उपलब्ध होत राहाते .

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.