आश्रमशाळा विद्यार्थ्यांचे आरोग्य अधिक सुदृढ होणार

अ‍ॅनिमिया मुक्तीसाठी ’सीएसीआर’सोबत सामंजस्य करार

नाशिक : प्रतिनिधी
आदिवासी विकास विभागाने राज्यातील शासकीय व अनुदानित आश्रमशाळा, तसेच एकलव्य मॉडेल निवासी शाळांमधील विद्यार्थ्यांच्या आरोग्याच्या दृष्टीने एक अत्यंत महत्त्वपूर्ण निर्णय घेतला आहे. आदिवासी विकास आयुक्त लीना बनसोड यांच्या संकल्पनेतून विद्यार्थ्यांमध्ये आढळणारी अ‍ॅनिमियाची (रक्तक्षय) समस्या दूर करण्यासाठी विभागाने सिटिझन्स असोसिएशन फॉर चाइल्ड राइट्स (सीएसीआर) या संस्थेशी सामंजस्य करार केला आहे. त्याअंतर्गत या शाळांमध्ये विशेष अ‍ॅनिमिया निवारण कार्यक्रम राबविला जाणार आहे.
आदिवासी क्षेत्रातील विद्यार्थ्यांच्या शैक्षणिक प्रगतीमध्ये अ‍ॅनिमिया हा एक मोठा अडथळा ठरत आहे. यामुळे विद्यार्थ्यांची आरोग्यस्थिती, पोषण, शालेय उपस्थिती व बौद्धिक विकासावर प्रतिकूल परिणाम होत असल्याचे निदर्शनास आले आहे. त्या पार्श्वभूमीवर आदिवासी विकास विभागाने विद्यार्थ्यांच्या सर्वांगीण विकासासाठी अ‍ॅनिमिया निवारण कार्यक्रम हाती घेतला आहे. या संपूर्ण उपक्रमाचा खर्च सीएसीआर संस्था करणार आहे.
अ‍ॅनिमिया निवारण कार्यक्रमाच्या यशस्वी अंमलबजावणीसाठी प्रकल्प अधिकारी, मुख्याध्यापक, निवासी परिचारिका, अधीक्षक आणि संगणक शिक्षक यांच्यावर विविध जबाबदारी सोपवण्यात आली आहे. सीएसीआर संस्थेच्या मदतीने ऑगस्ट 2026 अखेर पहिली तपासणी पूर्ण करण्याचे उद्दिष्ट ठेवण्यात आले आहे. त्यानंतर दर तीन महिन्यांनी नियमित फॉलोअप तपासणी केली जाणार आहे.
या सामंजस्य कराराप्रसंगी आदिवासी विकास आयुक्त लीना बनसोड, अपर आयुक्त (मुख्यालय) डिगंंबर चव्हाण, दिनकर पावरा, उपायुक्त संतोष ठुबे, शशिकला अहिरराव, सीएसीआर संस्थेचे सीईओ नितीन वाधवानी आदी उपस्थित होते.

आदिवासी विद्यार्थ्यांच्या उत्तम आरोग्य आणि दर्जेदार शिक्षणाला नेहमीच प्राधान्य राहिले आहे. आश्रमशाळांमधील विद्यार्थ्यांच्या सर्वांगीण विकासात मअ‍ॅनिमियाफ हा एक गंभीर शारीरिक अडथळा असल्याचे समोर आले होते. अ‍ॅनिमियामुक्तीसाठी ङ्गसीएसीआरफ संस्थेसोबत एक महत्त्वाकांक्षी सामंजस्य करार केला आहे. त्यामाध्यमातून विद्यार्थ्यांच्या आरोग्यासाठी एक भक्कम कवच निर्माण करत आहोत.
-लीना बनसोड, आयुक्त
आदिवासी विकास विभाग

The health of Ashram school students will improve.