फाळके स्मारक पुढील आठवड्यापासून खुले होणार डागडुजीची कामे अंतिम टप्प्यात

नाशिक : प्रतिनिधी
नाशिककर आणि पर्यटकांचे नेहमीच लक्ष वेधून घेणारे फाळके स्मारक गत अडीच वर्षांपासून बंद आहे . कोरोना महामारीमुळे निर्बंध लागू झाल्याने हे उद्यान बंद करण्यात आले होते . त्यानंतर शासनाने निर्बंधांमध्ये संपुर्ण शिथिलता आणल्यानंतरही हे स्मारक बंद आहे . दरम्यान पुढील आठवडयापासून म्हणजे सोमवार ( दि . २० ) पासून हे स्मारक नाशिकरांसाठी खुले करण्यात येणार आहे . कोरोनाचा प्रादुर्भाव कमी झाल्यानंतर नाशिक शहरातील विविध सभागृह , तसेच जिल्हयातील अभयारण्य यापूर्वीच खूली करण्यात आली . परंतु फाळके स्मारक अद्यापपर्यंत खुले करण्यात आलेलेच नसल्याने या स्मारकाला खुलण्यास मूहर्त कधी लागेल असा सवाल नाशिककरांकडून केला जात होता . पालिका आयुक्त रमेश पवार यांनी काही दिवसांपूर्वी या स्मारकाची पाहणी करत तेथे विविध कामे करण्याच्या सूचना बांधकाम विभागाला दिल्या होत्या . त्यानंतर पालिकेच्या काही अधिकाऱ्यांनी वेळोवेळी स्मारकाची पाहणी केली . स्मारकात प्रवेशासाठी पूर्वीच्या दराप्रमाणेच तीकिटासाठी पैसे मोजावे लागणार आहे . उद्यान खुले करण्यात येणार असल्याचे महापालिकेकडून वारंवार सांगण्यात येत असले तरी उद्यान मात्र खुले झालेले नाही . त्यामुळे आता २० जूनला तरी उद्यान खुले होणार का याकडे सर्वांचे लक्ष लागले आहे . मागील अडीच वर्षांपासून महापालिकेचे फाळके उद्यान बंद आहे . पालिकेने आता ते खूले करण्याचा निर्णय घेतल्याने या पार्श्वभूमीवर येथील डागडुजीची कामे केली जात असून ती अंतिम टप्यात आहे . स्मारक खुले करण्यापूर्वी मनपा आयुक्त रमेश पवार हे स्वत : उद्यानाची पाहणी करणार आहे .

येथील पांडव लेणी आणि फाळके उद्यान नाशिककरांबरोबर पर्यटकांना आर्कषित करते . बाहेरून आलेले पर्यटक या ठिकाणाला आर्वजून भेट देतात . मात्र , अडीच वर्षांपासून हे उद्यान बंद असल्याने ते कधी सुरू होणार असा प्रश्न नाशिककरांकडून वारंवार विचारला जात आहे . त्यामुळे महापालिका प्रशासनाने येथील कारंजा व इतर छोटी – मोठी कामे पुर्ण करून पुढील आठवड्यापासून उद्यान सुरू करण्याचा निर्णय घेतला आहे .