शेतकर्‍यांच्या समस्यांकडे सत्ताधार्‍यांचे दुर्लक्ष

उद्धव ठाकरे : सरकारविरुद्ध आंदोलन

छत्रपती संभाजीनगर : प्रतिनिधी
शिवसेना (उबाठा) पक्षाचे प्रमुख उद्धव ठाकरे यांनी राज्यातील सत्ताधारी महायुती सरकारवर अत्यंत कडक शब्दांत टीका केली आहे. मराठवाड्याच्या खर्‍या समस्यांवर आणि प्रलंबित प्रश्नांवर बोलण्याची सध्याच्या सत्ताधारी पक्षांमध्ये हिंमत उरलेली नाही, असा थेट घणाघात त्यांनी केला आहे. उद्धव ठाकरे यांनी शेतकरी, दुष्काळ आणि सरकारच्या उदासीनतेवर बोट ठेवत सरकारला धारेवर धरले आहे. मराठवाडा मुक्तिसंग्राम दिनाच्या निमित्ताने ‘तुमसे ना हो पाऐगा’ या आंदोलनानिमित्त ते शहरात आले होते. मराठवाड्यातील जनतेसाठी महत्त्वाचे आंदोलन असल्याने एमआयएम पक्षाने या आंदोलनाला पाठिंबा दिला होता. प्रदेशाध्यक्ष इम्तियाज जलील आंदोलनात सहभागी झाले होते.
ठाकरे यांनी निदर्शनास आणून दिले की, मराठवाड्यातील शेतकरी सध्या अत्यंत कठीण परिस्थितीतून जात आहेत. पावसाचा मोठा खंड, त्यामुळे करपलेली पिके आणि वाढता कर्जबाजारीपणा यामुळे बळीराजा हवालदिल झाला आहे. मात्र, राज्याचे मुख्यमंत्री आणि उपमुख्यमंत्री या ज्वलंत प्रश्नांवर तोडगा काढण्याऐवजी केवळ राजकीय गणिते जुळवण्यात आणि घोषणाबाजीत व्यस्त आहेत. शेतकर्‍यांच्या बांधावर जाऊन त्यांना धीर देण्याची आणि थेट आर्थिक मदत देण्याची संवेदनशीलता या सरकारने गमावली आहे, अशी टीका त्यांनी केली.
मराठवाड्याच्या विकासासाठी सत्ताधार्‍यांकडून केवळ कागदी घोडे नाचवले जात असल्याचा आरोप ठाकरे यांनी केला. मराठवाड्यात मंत्रिमंडळाच्या बैठका घेतल्या जातात, हजारो कोटींच्या पॅकेजच्या घोषणा केल्या जातात, मात्र प्रत्यक्षात तळागाळातील लोकांपर्यंत कोणतीही ठोस मदत पोहोचत नाही. मागील वर्षी केलेल्या घोषणांची अद्याप अंमलबजावणी झालेली नाही, मग नव्याने आश्वासने देऊन मराठवाड्याच्या जनतेची फसवणूक करण्याचा अधिकार सत्ताधार्‍यांना कोणी दिला, असा थेट सवाल त्यांनी उपस्थित केला.
ठाकरे यांनी सत्ताधार्‍यांना आव्हान देत म्हटले आहे की, जर तुमच्यात खरोखरच हिंमत असेल, तर मराठवाड्याच्या पाणीप्रश्नावर, बेरोजगारीवर आणि रखडलेल्या सिंचन प्रकल्पांवर जाहीरपणे बोला आणि उत्तरे द्या. महाविकास आघाडीचे सरकार असताना आपण शेतकर्‍यांसाठी घेतलेल्या कर्जमाफीसारख्या निर्णयांची आठवण करून देत, सध्याचे सरकार केवळ ’इव्हेंट मॅनेजमेंट’ आणि जाहिरातबाजीत अडकले असल्याचे त्यांनी स्पष्ट केले. मराठवाड्यातील जनता आणि शेतकरी या सरकारच्या दुटप्पी भूमिकेला पूर्णपणे ओळखून असून, आगामी काळात लोकशाहीच्या माध्यमातून ते या नाकर्त्या सरकारला त्यांची योग्य जागा नक्की दाखवून देतील, असा ठाम विश्वास उद्धव ठाकरे यांनी यावेळी व्यक्त केला.

Those in power neglect farmers’ issues.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.