गणेश विसर्जन मिरवणुकीमुळे शहरातील वाहतुकीत बदल

सिडको : प्रतिनिधी
शहरातील सार्वजनिक गणेशोत्सवाच्या मुख्य विसर्जन मिरवणुकीच्या पार्श्वभूमीवर नाशिक शहर वाहतूक पोलिसांनी वाहतूक मार्गात मोठे बदल केले आहेत. 25 सप्टेंबर रोजी सकाळी 10 वाजेपासून विसर्जन मिरवणूक संपेपर्यंत शहरातील प्रमुख रस्त्यांवरील वाहतूक बंद राहणार आहे. वाहनचालकांना पर्यायी मार्गांचा वापर करावा लागणार आहे.
नाशिक शहराची मुख्य गणेश विसर्जन मिरवणूक 25 सप्टेंबर रोजी वाकडी बारव (चौकमंडई) येथून सुरू होणार आहे. जहांगिर मशीद, दादासाहेब फाळके रोड, महात्मा फुले मार्केट, दूध बाजार चौक, बादशाही लॉज कॉर्नर, गाडगे महाराज पुतळा, गो. ह. देशपांडे पथ, धुमाळ पॉईंट, सांगली बँक सिग्नल, महात्मा गांधी रोड, मेहेर सिग्नल, स्वामी विवेकानंद रोड, अशोकस्तंभ, नवीन तांबट आळी, रविवार कारंजा, होळकर पूल, मालेगाव स्टॅण्ड, पंचवटी कारंजा, मालवीय चौक, परशुरामपुरीया रोड, कपालेश्वर मंदिर, भाजी बाजार आणि म्हसोबा पटांगण येथील विसर्जनस्थळी मिरवणूक पोहोचणार आहे.
या मिरवणुकीमुळे मिरवणूक मार्गासह शहरातील काही प्रमुख रस्त्यांवर सर्वसामान्य वाहनांना प्रवेश बंद करण्यात आला आहे.
मिरवणूक मार्गावरील वाहतूक निर्बंध 25 सप्टेंबर रोजी सकाळी 10 वाजेपासून मिरवणूक संपेपर्यंत लागू राहतील. मिरवणुकीतील वाहने, पोलीस वाहने, रुग्णवाहिका, अग्निशमन दलाची वाहने तसेच संबंधित परिसरातील स्थानिक रहिवाशांची वाहने या निर्बंधातून वगळण्यात आली आहेत.
विसर्जन मिरवणुकीच्या काळात गर्दी टाळण्यासाठी वाहनचालकांनी शक्यतो गर्दीच्या ठिकाणांपासून दूर असलेल्या पर्यायी मार्गांचा वापर करावा, असे आवाहन वाहतूक पोलिसांनी केले आहे. परिस्थितीनुसार वाहतूक मार्ग आणि वेळेत ऐनवेळी बदल करण्याचा अधिकारही पोलिसांनी राखून ठेवला आहे.

Traffic changes in the city due to the Ganesh immersion procession.

Leave a Reply

Your email address will not be published. Required fields are marked *