मनमाडमध्ये रिक्षातच ऊसतोड महिलेची प्रसूती
मनमाड : प्रतिनिधी
विकासाच्या कितीही गप्पा मारल्या जात असल्या, तरी महामार्गावरील जीवघेणी वाहतूक कोंडी गरिबांच्या जीवावर कशी बेतू शकते, याचा प्रत्यय पुन्हा एकदा मनमाडमध्ये आला. इंदूर-पुणे राष्ट्रीय महामार्गावर तासन् तास अडकून पडलेल्या एका ऊसतोड मजूर महिलेला रुग्णालय गाठणे अशक्य झाल्याने चक्क धावत्या रिक्षातच बाळंत व्हावे लागले. सुदैवाने आई आणि नवजात कन्या दोन्ही सुखरूप आहेत.
गेल्या अनेक वर्षांपासून मनमाड शहरातील इंदूर-पुणे महामार्ग हा बायपास करावा किंवा शहराच्या मध्यवर्ती भागातून उड्डाणपूल तयार करावा, अशी मागणी होत आहे. नुकतेच केंद्रीय रस्ते वाहतूकमंत्री नितीन गडकरी यांनी राज्याचे मंत्री छगन भुजबळ यांच्या मागणीवरून मालेगाव ते कोपरगावपर्यंत तब्बल 980 कोटी रुपयांचा चार पदरी सिमेंट महामार्ग मंजूर केला आहे. लवकरच त्याचे काम सुरू होणार आहे. मात्र, तोपर्यंत अजून किती गर्भवती महिलांना रस्त्यावर बाळंत व्हावे लागेल, असा प्रश्न केला जात आहे.
याबाबत सविस्तर वृत्त असे की, नंदुरबार जिल्ह्यातील केलीपाणी येथील आवेश वडवे या ऊसतोड मजूर महिला आपल्या कुटुंबासह सोलापूरहून ऊसतोडणीचे काम संपवून घराकडे परतत होत्या. मनमाड शहरातून जाणार्या इंदूर-पुणे महामार्गावर पोहोचल्यावर त्यांना प्रसूती वेदना सुरू झाल्या. त्यांच्या पतीने तत्काळ त्यांना रिक्षातून रुग्णालयात नेण्याचा प्रयत्न केला. मात्र, या महामार्गावर झालेल्या वाहतूक कोंडीमुळे वाहनांच्या मैलोन् मैल रांगा लागल्या होत्या. रुग्णवाहिका बोलावणे किंवा खासगी वाहनाने वेळेत उपजिल्हा रुग्णालय गाठणे अशक्य झाले होते. यावेळी रिक्षाचालकाच्या पुढाकाराने व स्थानिक व्यक्तीच्या मदतीने रिक्षातच बाळंतपण केले. सुदैवाने मायलेकी दोघीही सुखरूप आहेत.
रिक्षाचालकाचा देवदूत बनून पुढाकार
ऊसतोड महिलेची प्रकृती बिघडत असल्याचे पाहून रिक्षाचालक अमजद अत्तर यांनी माणुसकी दाखवत पुढाकार घेतला. सामाजिक कार्यकर्ते रितेश पगारे यांनी दुचाकीवरून समोरून येत असलेली वाहतूक बाजूला करत रिक्षाला वाट करून देण्याचा प्रयत्न केला. मात्र, रुग्णालयात पोहोचण्यापूर्वीच वेदना असह्य झाल्या आणि रिक्षातच एका गोंडस चिमुकलीचा जन्म झाला.
लासलगाव : वार्ताहर लासलगाव कृषी उत्पन्न बाजार समितीत गुरुवार (दि. 19) आणि शुक्रवार (दि. 20)…
कार्तिकी एकादशी जिला प्रबोधिनी एकादशी किंवा देवउठनी एकादशी असेही म्हटले जाते. या दिवशी पांडुरंगाच्या दर्शनासाठी…
सिंहस्थासाठी साधुग्राममध्ये पंधराशे एकरमध्ये काम होणार नाशिक : प्रतिनिधी सिंहस्थ कुंभमेळ्याच्या पार्श्वभूमीवर तपोवनातील साधुग्राममध्ये विविध…
अतिरिक्त भाडेही नाही; सिटीलिंकची माहिती नाशिक : प्रतिनिधी केंद्र शासनाच्या योजनेंतर्गत नाशिकसाठी 50 इलेक्ट्रिक बसेस…
महासभेत घोषणा; दुसरी जागा ठाकरे गटाने मिळवलीच नाशिक : प्रतिनिधी संपूर्ण शहराचे लक्ष लागून राहिलेल्या…