Categories: महाराष्ट्र

एकाच दिवशी दोन जण लाचलुचपतच्या जाळ्यात

एकाच दिवशी दोन जण लाचलुचपतच्या जाळ्यात
नाशिक: प्रतिनिधी
एकाच दिवशी नाशिकरोड विभागीय कार्यालयातील विभागीय तांत्रिक अधिकारी आणि घोटी पोलीस ठाण्यातील पोलीस लाच घेताना रंगेहाथ पकडण्यात आले.
नाशिकरोड विभागीय कार्यालयातील तांत्रिक अधिकारी राजेंद्र भागवत केदारे यांनी तक्रारदार यांच्या भावाच्या पत्नी या महिला बचत गटाच्या अध्यक्ष असून त्यांना जिल्हा पुरवठा विभागाकडून स्वस्त धान्य दुकान मंजूर झाले आहे. त्यावर नाशिक विभागीय आयुक्त कार्यालय येथे अपील सुरु होते. या अपिलाचा निकाल हा तक्रारदार यांच्या वहिनीच्या बचत गटाच्या बाजूच्या लागल्याने सदर अपीलाचा निकालाची प्रत देण्यासाठी केदारे यांनी 15 हजारांच्या लाचेची मागणी केली होती. दहा हजार रुपयांवर तडजोड केल्यानंतर दहा हजार रुपये स्वीकारताना केदारे यांना रंगेहाथ पकडण्यात आले. पोलीस निरीक्षक राजेंद्र सानप, हवालदार प्रफुल्ल माळी, विलास निकम, संतोष गांगुर्डे यांच्या पथकाने ही कारवाई केली.

घोटीत पोलीस पाचशेची
लाच घेताना जाळ्यात
घोटी पोलीस ठाण्यातील पोलीस कर्मचारी विकास चंद्रकांत झालटे यांना पाचशे रुपयांची लाच घेताना रंगेहाथ पकडण्यात आले. तक्रारदार यांची पिकअप गाडी असून तेघोटी हद्दीत प्रवाशी आणि माल वाहतूक करतात. गाडी सुरू ठेवण्यासाठी तसेच गाडीवर कारवाई करू नये म्हणून पाचशे रुपयांची पंचा समक्ष लाच स्वीकारली असता त्यांना ताब्यात घेण्यात आले. पोलीस निरीक्षक मीरा आदमाणे यांच्या नेतृत्वाखाली हवालदार पंकज पळशीकर,प्रमोद चव्हाणके, दीपक पवार, विनोद पवार यांनी ही कारवाई केली. अधीक्षक श्रीमती शर्मिष्ठा वालावलकर, अपर अधीक्षक माधव रेड्डी यांच्या मार्गदर्शनाखाली ही कारवाई करण्यात आली.

भागवत उदावन्त Admin

भागवत उदावंत हे गेल्या 25 वर्षापासून पत्रकारितेत असून, विविध दैनिकांत उपसंपादक, वरिष्ठ उपसंपादक म्हणून काम केलेले आहे. गांवकरीत सध्या वृत्तसंपादक या पदावर कार्यरत आहेत. ऑनलाइन व डिजिटल पत्रकारिता बरोबरच राजकीय विषयावर विपुल लेखन केलेलं आहे. पत्रकारितेतील मास्टर पदवी त्यांनी मिळवलेली आहे.