गणेशमूर्ती विसर्जन करताना दोन विद्यार्थ्यांचा बुडून मृत्यू

नामपूर येथील मोसम नदीपात्रातील घटना

नामपूर : वार्ताहर
बागलाण तालुक्यातील नामपूर येथे गणेशमूर्ती विसर्जनादरम्यान मोसम नदीपात्रात बुडून दोन शालेय विद्यार्थ्यांचा मृत्यू झाल्याची हृदयद्रावक घटना घडली. शुक्रवारी (दि. 18) दुपारी घडलेल्या या घटनेमुळे नामपूर परिसरात शोककळा पसरली.
अथर्व दीपक पगार (वय 17, रा. उत्राणे) आणि प्रसाद दादाजी वाघ (वय 18, रा. नामपूर) अशी मृत विद्यार्थ्यांची नावे आहेत. हे दोन्ही विद्यार्थी नामपूर-मालेगाव रस्त्यावरील ग्रामीण रुग्णालयासमोर असलेल्या गजानन संकुलातील ‘एलिक्झर लर्निंग क्लासेस’मध्ये शिक्षण घेत होते. क्लासच्या विद्यार्थ्यांनी बाप्पाची प्रतिष्ठापना केली होती. ठरल्याप्रमाणे पाचव्या दिवशी शुक्रवारी दुपारी दोनच्या सुमारास क्लासमधील विद्यार्थी बाप्पाच्या विसर्जनासाठी वाजतगाजत मोसम नदीपात्रात गेले होते. विसर्जन मिरवणूक आणि आनंदाचे वातावरण असतानाच अचानक घडलेल्या या दुर्घटनेत दोन विद्यार्थ्यांचा पाण्यात बुडून मृत्यू झाला. याच दरम्यान, त्यांच्यासोबत असलेला विरेंद्र विशाल अहिरे (वय 17) याचाही पाय घसरला होता; परंतु त्याचे नशीब बलवत्तर म्हणून प्रसंगावधानाने तो तात्काळ पाण्याच्या बाहेर आल्याने थोडक्यात बचावला. घटनेची माहिती मिळताच जायखेडा पोलीस ठाण्याचे सहायक पोलीस निरीक्षक सागर काळे आणि एस. के. मगर यांनी घटनास्थळी धाव घेत पंचनामा केला. तसेच पुढील चौकशीसाठी क्लासचे संचालक अशोक पाटील यांना ताब्यात घेण्यात आले आहे. घटनेची माहिती समजताच नामपूर ग्रामीण रुग्णालयात नातेवाईक आणि नागरिकांनी गर्दी केली होती. आपल्या लाडक्या लेकरांच्या जाण्याने नातेवाइकांनी केलेल्या हंबरड्याने उपस्थितांचे मन हेलावून गेले. दरम्यान, गणेशोत्सवादरम्यान विसर्जन मिरवणूक काढताना आणि नदीपात्रात जाताना नागरिकांनी व विद्यार्थ्यांनी योग्य ती काळजी घ्यावी, असे आवाहन जायखेडा पोलीस प्रशासनातर्फे करण्यात आले.

Two students drown during Ganesh idol immersion.