आठ वर्षांपासून फरार ‘खलनायक’ला अटक

गुंडाविरोधी पथकाची उल्लेखनीय कारवाई

सिडको : विशेष प्रतिनिधी
निकम गँग व उघडे गँग यांच्यातील वर्चस्ववादातून 18 मे 2017 रोजी नवनाथनगर, पंचवटी, नाशिक येथे किरण राहुल निकम याचा निर्घृण खून करण्यात आला होता. या खून प्रकरणात गुन्हा दाखल झाल्यापासून तब्बल आठ वर्षांपासून फरार असलेला विकास ऊर्फ विक्की पंजाबी याला अखेर अटक करण्यात आली आहे. गुंडाविरोधी पथकाने हिमाचल प्रदेशातील दुर्गम भागातून त्याला ताब्यात घेऊन नाशिकमध्ये आणले आहे. याप्रकरणी पंचवटी पोलीस ठाण्यात गुन्हा दाखल होता. या प्रकरणातील अन्य आरोपींना जन्मठेपेची शिक्षा झाली असताना, मुख्य आरोपी विक्की पंजाबी हा गुन्हा घडल्यापासून फरार होता.पोलिस आयुक्त संदीप कर्णीक यांनी गुंडाविरोधी पथकाला तातडीने कारवाईचे आदेश दिले होते. त्यांच्या मार्गदर्शनाखाली पोलिस उपआयुक्त (गुन्हे) किरणकुमार चव्हाण व सहाय्यक पोलिस आयुक्त (गुन्हे) संदीप मिटके यांनी तपासाची दिशा ठरवली. तपासादरम्यान पोलीस अंमलदार विजय सूर्यवंशी व राजेश राठोड यांना मिळालेल्या माहितीनुसार आरोपी चंदीगड येथे व्यवसाय करत असल्याचे निष्पन्न झाले. पुढील तपासात आरोपी विकास ऊर्फ विक्की पंजाबी हिमाचल प्रदेशातील कुल्लू जिल्ह्यातील पुलगा गावात वास्तव्यास असल्याचे समोर आले. गुंडाविरोधी पथकाचे पथक कुल्लू येथे रवाना झाले. 23 ऑगस्ट 2025 रोजी रात्री पुलगा परिसरातील हॉटेल्स आणि घरे तपासल्यानंतर पहाटे चार वाजता आरोपीला ताब्यात घेण्यात आले. त्याने गुन्ह्याची कबुली दिल्यानंतर त्याला कुल्लू येथील न्यायालयात हजर करण्यात आले. ट्रान्झिट रिमांड घेऊन त्यास नाशिकमध्ये आणण्यात आले आहे. तपास पंचवटी पोलीस ठाणे करत आहे. या कामगिरीत सहाय्यक पोलीस निरीक्षक ज्ञानेश्वर मोहिते यांच्या नेतृत्वाखाली पोलीस अंमलदार विजय सूर्यवंशी, प्रदीप ठाकरे, अक्षय गांगुर्डे, गणेश भागवत, राजेश राठोड, कल्पेश जाधव,
घनःश्याम महाले आणि दयानंद सोनवणे यांनी सहभाग घेतला.