द्वारका परिसरात पुन्हा दोन वेळा पाणीपुरवठा

नगरसेवकांच्या भेटीनंतर महापौरांचे निर्देश; नागरिकांचे हाल पाहता निर्णय

नाशिक : प्रतिनिधी
चाचणीच्या नावाखाली महापालिकेच्या पाणीपुरवठा विभागाने द्वारका परिसरातील दोन वेळा होणार पाणीपुरवठा एकदा करण्याचा निर्णय घेतला होता. दरम्यान, या निर्णयामुळे द्वारकाच्या प्रभाग 15 मधील नागरिकांचे प्रचंड हाल होत असल्याने प्रशासनाने तत्काळ पुन्हा दोन वेळा पूर्वीप्रमाणेच पाणीपुरवठा करण्याची मागणी नगरसेवक प्रथमेश गिते व सीमा पवार यांनी महापौर हिमगौरी आहेर-आडके यांच्याकडे केली.
नागरिकांचे होणारे हाल महापौरांच्या निदर्शनास आणून दिले. यानंतर महापौरांनी या प्रकरणाची गांभीर्याने दखल घेत पाणीपुरवठा विभागाचे अधीक्षक अभियंता रवींद्र धारणकर यांना पुन्हा दोन वेळा पाणीपुरवठा करण्याचे निर्देश दिले.
महापौर आडके यांनी द्वारका परिसरातील नगरसेवकांनी सोमवारी बैठक घेतली. दरम्यान, काही दिवसांपूर्वी पंचवटीतील प्रभाग क्रमांक तीनच्या नगरसेविका प्रियंका माने व धनंजय माने यांनी निलगिरी बाग जलशुद्धीकरण केंद्रावर जाऊन द्वारका परिसराला दोनदा पाणीपुरवठा केला जात असल्याने त्यांनी सदर पाणीपुरवठाच बंद केला होता.
यानंतर मात्र नगरसेविका सीमा पवार यांनी महासभेत द्वारका भागाला कोणी पाणी देईल का? असा सवाल उपस्थित केला होता. यामुळे दोन विभागातील नगरसेवक समोरासमोर ठाकले होते. त्यातच पाणी पुरवठा विभागाने द्वारकेला दिवसातून एकदाच पाणीपुरवठा करण्याचे नियोजन केले. परंतु यामुळे लाखो लोकांना फटका बसत असल्याचे चित्र होते. नागरिकांकडे पाणी साठवण्याची सुविधा नसल्याने त्यांना मोठ्या अडचणींना सामोरे जावे लागत होते. द्वारका भागातील पाणीपुरवठा एकवेळ केल्याने नागरिकांमध्ये तीव्र नाराजी होती.
या पार्श्वभूमीवर नगरसेवक प्रथमेश गिते व सीमा पवार यांनी सोमवारी महापौर आहेर-आडके यांची भेट घेऊन परिस्थितीची सविस्तर माहिती दिली व तातडीने दोनवेळा पाणीपुरवठा सुरू करण्याची मागणी केली.
महापौरांनी लोकभावना लक्षात घेत, द्वारका परिसरातील पाणीपुरवठा पूर्ववत करण्याचे निर्देश दिले आहे. याबरोबरच त्यांना संबंधित विभागास पंचवटीतील पाणीपुरवठा वाढविण्याचेही निर्देश दिले अहे. त्यानुसार या वादावर तोडगा काढण्याचा प्रयत्न केला आहे.

द्वारका परिसरात एक वेळा पाणीपुरवठा होत असल्याने नागरिकांना वेगवेगळ्या अडचणींना सामोरे जावे लागत होते. याप्रकरणी नागरिकांच्या भावना पाहून येथील पाणीपुरवठा पुन्हा दोन वेळा करण्याच्या सूचना केल्या आहेत. तसेच पंचवटीतदेखील अधिक प्रमाणात व सुरळीत पाणीपुरवठा करण्याच्या सूचना पाणीपुरवठा विभागातील अधिकार्‍यांना केल्या आहेत.
-हिमगौरी आहेर-आडके, महापौर

Water supply in Dwarka area again twice