महिलेच्या पोटात ‘बाळ’ नव्हे, तर तब्बल 5.5 किलोची गाठ

सिन्नरमधील पवार जनरल हॉस्पिटलमध्ये 26 वर्षीय महिलेवर यशस्वी शस्त्रक्रिया

सिन्नर : प्रतिनिधी
शहरातील पवार जनरल हॉस्पिटल येथे नुकतीच एक आगळीवेगळी आणि अत्यंत गुंतागुंतीची शस्त्रक्रिया यशस्वीरीत्या पार पाडत एका 26 वर्षीय महिलेला नवजीवन मिळाले. गर्भवती असल्याचा समज झालेल्या या महिलेला प्रत्यक्षात पोटात तब्बल साडेपाच किलो वजनाची गाठ असल्याचे उघड झाल्याने
खळबळ उडाली.
सिन्नर शहरातील रहिवासी असलेल्या या महिलेला गेल्या नऊ महिन्यांपासून गर्भधारणा झाल्याचा भास होत होता. मात्र, या कालावधीत एकही सोनोग्राफी तपासणी करण्यात आली नव्हती. शेवटी सोनोग्राफीसाठी गेल्यावर धक्कादायक वास्तव समोर आले, ती गर्भवती नसून, तिच्या पोटात मोठी गाठ होती.
त्यानंतर तातडीने तिला पवार जनरल हॉस्पिटलमध्ये दाखल करण्यात आले. स्त्रीरोगतज्ज्ञ डॉ. सुशील पवार यांनी आवश्यक तपासण्या करून शस्त्रक्रियेचा सल्ला दिला. ही शस्त्रक्रिया अत्यंत जटिल स्वरूपाची होती, कारण गाठ पोटाच्या स्नायूमध्ये असून, ती मूत्राशय, गर्भाशय आणि आतड्यांना चिकटलेली होती.
डॉ. सुशील पवार यांनी डॉ. निर्मला पवार यांच्या सहकार्याने ही अवघड शस्त्रक्रिया यशस्वीरीत्या पार पाडली. या प्रक्रियेसाठी हॉस्पिटलचे संचालक डॉ. जी. एल. पवार यांचे मार्गदर्शन तसेच भूलतज्ज्ञ डॉ. संजय वलवे यांचे सहकार्य लाभले. शस्त्रक्रियेनंतर जनरल सर्जन डॉ. प्रशांत मुठाळ यांनी पोटाच्या स्नायूंचे पुढील उपचार केले.
या यशस्वी शस्त्रक्रियेमुळे संबंधित महिलेला मोठा दिलासा मिळाला असून, डॉक्टरांच्या कौशल्यामुळे एक गंभीर धोका टळला आहे. स्थानिक स्तरावर या घटनेची मोठी चर्चा होत आहे.

Woman’s stomach not filled with ‘baby’, but with a 5.5 kg lump

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.