शहरात ’हर हर महादेव’चा जयघोष

श्रावणी सोमवार अन् संकष्ट चतुर्थीचा योग

नाशिक : प्रतिनिधी
श्रावणी सोमवार आणि संकष्ट चतुर्थीचा योग साधत सोमवारी (दि. 31 ऑगस्ट) नाशिक शहरातील विविध मंदिरांत भाविकांची मोठी गर्दी पाहायला मिळाली. पहाटेपासूनच शहरातील प्रमुख शिवमंदिरांकडे भाविकांंची पावले वळली. महादेवाच्या दर्शनासाठी सोमेश्वर, कपालेश्वर, तसेच त्र्यंबकेश्वर मंदिरात भाविकांच्या रांगा लागल्या होत्या. हर हर महादेव, ॐ नमः शिवायच्या जयघोषाने मंदिर परिसर भक्तिमय झाला होता.
श्रावणातील सोमवारला धार्मिकदृष्ट्या विशेष महत्त्व असल्याने अनेक भाविकांनी पहाटेच मंदिरे गाठली. महादेवाच्या पिंडीवर जलाभिषेक व दुग्धाभिषेक करून बेलपत्र, फुले अर्पण करण्यात आली. मंदिरांत विधिवत पूजा, मंत्रपठण आणि आरतीचे आयोजन करण्यात आले होते. उपवास करणार्‍या भाविकांची संख्याही मोठी होती.
सोमेश्वर मंदिरात सकाळपासूनच दर्शनासाठी भाविकांची वर्दळ वाढली होती. कपालेश्वर मंदिर परिसरातही भाविकांच्या रांगा लागल्याने मंदिर परिसर गजबजून गेला होता. त्र्यंबकेश्वर येथेही शहरासह विविध भागांतून भाविक दर्शनासाठी दाखल झाले होते. भाविकांनी मनोभावे पूजाअर्चा करून महादेवाचे दर्शन घेतले.

गर्दी नियंत्रणासाठी यंत्रणा सज्ज
प्रमुख मंदिरांत वाढणारी गर्दी लक्षात घेऊन मंदिर प्रशासनाने दर्शन व्यवस्था सुरळीत ठेवण्यासाठी नियोजन केले होते. रांगा, प्रवेश-निर्गमन आणि भाविकांच्या हालचालीवर लक्ष ठेवण्यात आले. कपालेश्वर मंदिर परिसरात गर्दीच्या पार्श्वभूमीवर पोलिसांचा कडेकोट बंदोबस्त ठेवण्यात आला होता. भाविकांची गैरसोय होऊ नये आणि वाहतूक सुरळीत राहावी, यासाठी पोलिसांकडून विशेष खबरदारी घेण्यात आली होती.

गणरायाच्या दर्शनासाठीही रांगा
श्रावणी सोमवारसोबतच संकष्ट चतुर्थी असल्याने गणेश मंदिरांतही सकाळपासून भाविकांची गर्दी झाली होती. गणरायाला दूर्वा, फुले व नैवेद्य अर्पण करून भाविकांनी पूजा केली. विविध गणेश मंदिरांमध्ये अभिषेक व आरतीचे आयोजन केले होते. शिवदर्शनानंतर गणरायाचे दर्शन घेण्यासाठी अनेक भाविकांनी गणेश मंदिरांकडेही धाव घेतली. एकाच दिवशी श्रावणी सोमवार व संकष्ट चतुर्थी आल्याने शहरातील मंदिरांमध्ये दिवसभर धार्मिक वातावरण राहिले. मंदिर परिसरात भाविकांच्या गर्दीसोबत पूजासाहित्य विक्री करणार्‍या दुकानदारांचीही लगबग वाढली होती. फुले, बेलपत्र, दूर्वा आणि पूजासाहित्य खरेदीसाठी भाविकांची गर्दी दिसली.

Chants of ‘Har Har Mahadev’ echo through the city.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.