दीपालीनगरमध्ये जबरी चोरीची घटना

दुचाकीवरील दोघांकडून 45 हजारांचे मंगळसूत्र लंपास

सिडको : विशेष प्रतिनिधी
दीपालीनगर भागात एका गृहिणीच्या गळ्यातील सोन्याचे मंगळसूत्र दुचाकीस्वार दोन अनोळखी चोरट्यांनी जबरीने खेचून लंपास केल्याची घटना रविवारी संध्याकाळी घडली. याप्रकरणी मुंबई नाका पोलीस ठाण्यात जबरी चोरीचा गुन्हा दाखल करण्यात आला आहे.
फिर्यादी संजीवनी संतोष सोनसकर (वय 49, रा. विनयनगर, नाशिक) या दि. 4 मे 2025 रोजी सायंकाळी साडेसहाच्या सुमारास दीपालीनगर येथील सिद्धिविनायक मंदिराजवळून उजव्या बाजूच्या गल्लीतून जात असताना ही घटना घडली. त्या वेळी काळ्या रंगाच्या पल्सर दुचाकीवर आलेल्या दोन अनोळखी इसमांनी त्यांच्या गळ्यातील अंदाजे दहा ग्रॅम वजनाचे, सुमारे 45 हजार रुपये किंमतीचे सोन्याचे मंगळसूत्र जबरदस्तीने खेचून पळ काढला.
या घटनेनंतर घाबरलेल्या संजीवनी सोनसकर यांनी तत्काळ मुनाका पोलीस ठाण्यात धाव घेत तक्रार दाखल केली. त्यांच्या तक्रारीवरून मुंबई नाका पोलीस ठाण्यात गुन्हा दाखल करण्यात आला आहे.
मुंबई नाका पोलीस ठाण्याचे वरिष्ठ पोलीस निरीक्षक संतोष नरुटे यांच्या मार्गदर्शनाखाली सपोनि एस. शिरसाठ आणि पोउनि एम.एल. शेख यांच्या मार्गदर्शनाखाली तपास सुरू आहे. दरम्यान, शहरात दिवसाढवळ्या चोरीच्या घटनांमुळे नागरिकांमध्ये भीतीचे वातावरण निर्माण झाले आहे.पोलिसांनी गस्त वाढवण्याची मागणी नागरिकांकडून होत आहे.