पोलीस ठाण्यात कथित गोळीबाराची चर्चा

पोलीस आयुक्तांंकडून चौकशीचे आदेश

नाशिक : प्रतिनिधी
शहर पोलीस आयुक्तालयाच्या हद्दीतील एका पोलीस ठाण्यात पोलीस निरीक्षकाने शासकीय पिस्तुलातून गोळी झाडल्याची चर्चा रंगू लागल्याने शहरात खळबळ उडाली आहे. सोशल मीडियावरही विविध पोस्ट आणि प्रतिक्रिया व्हायरल होत आहेत. मात्र, या घटनेची कोणतीही अधिकृत नोंद उपलब्ध नसल्याचे पोलीस प्रशासनाने स्पष्ट केले आहे.
मिळालेल्या माहितीनुसार, संबंधित पोलीस निरीक्षकाने पोलीस ठाण्याच्या परिसरात शासकीय पिस्तुलातून गोळी झाडल्याची चर्चा नवीन नाशिक आणि सिडको परिसरात दिवसभर सुरू होती. गोळीबार नेमका कोणत्या कारणातून झाला, त्यावेळी पोलीस ठाण्यात कोण उपस्थित होते, तसेच या प्रकारात कोणतीही जीवितहानी किंवा नुकसान झाले का, याबाबत स्पष्ट माहिती समोर आलेली नाही. त्यामुळे विविध तर्क-वितर्कांना उधाण आले आहे.
सामान्य नागरिकांना कायद्याचे धडे देणारे अधिकारीच नियमांचे उल्लंघन करत असतील तर ही गंभीर बाब आहे. पोलीस ठाण्यात गोळीबार झाल्याची चर्चा होत असताना अधिकृत माहिती समोर येत नाही, हे धक्कादायक आहे, असे दानवे यांनी म्हटले आहे. संबंधित अधिकार्‍याला वाचवण्यासाठी प्रकरण दडपले जात आहे का, असाही सवाल त्यांनी उपस्थित केला.

सीसीटीव्ही फुटेज तपासणार
दरम्यान, नाशिक शहर पोलीस आयुक्त संदीप कर्णिक यांनी या प्रकरणाची दखल घेत स्पष्टीकरण दिले आहे. शहरातील सर्व पोलीस ठाण्यांमध्ये सीसीटीव्ही यंत्रणा कार्यरत असून, फुटेज केंद्रीय स्तरावर सुरक्षितरीत्या जतन केले जाते आणि ते नष्ट करता येत नसल्याचेही त्यांनी सांगितले. हे प्रकरण संवेदनशील स्वरूपाचे असल्याने सर्व पोलीस ठाण्यांतील सीसीटीव्ही फुटेज तपासून सखोल चौकशी करण्यात येणार आहे. आवश्यक असल्यास विभागीय कारवाईही केली जाईल, असेही आयुक्तांनी स्पष्ट केले.

दानवे, आव्हाडांची टीका
डेली डायरीमध्ये उल्लेख आहे का?, सीसीटीव्ही फुटेजमध्ये नेमके काय दिसते? असे प्रश्नही उपस्थित केले जात आहेत. दरम्यान, शिवसेना ठाकरे गटाचे नेते अंबादास दानवे आणि राष्ट्रवादी काँग्रेस शरद पवार गटाचे नेते जितेंद्र आव्हाड यांनी या प्रकरणावरून राज्य सरकार आणि गृह विभागावर टीका केली आहे.

Discussion of alleged shooting at police station