भावली खुर्द येथे जलकुंभाचे लोकार्पण

इगतपुरी : प्रतिनिधी
इगतपुरी तालुक्यातील भावली खुर्द येथे जलकुंभाचे नुकतेच लोकार्पण करण्यात आले. भावली खुर्द ग्रामपंचायतीमधील तांबडमाळ या आदिवासी वस्तीत ज्ञानप्रबोधिनी संस्थेतर्फे बांधण्यात आलेल्या जलकुंभाचे लोकार्पण रोटरी क्लब ऑफ नाशिक ग्रेप सिटीच्या अध्यक्षा मधुवंती सिद्धये यांच्या हस्ते झाले.
यावेळी ज्ञान प्रबोधिनीचे स्वामी देवसेवानंद, ग्रामसेविका रूपाली जाधव, रोटरी क्लबच्या सचिव जयश्री पाटील, सदस्य आशा वेणुगोपाल, अंजली मेहता, दुर्गा साली, अच्छमा अलूर, मीना जैन, मेधा पुणतांबेकर, अमित घरटे व ग्रामस्थ उपस्थित होते.
तांबडमाळ येथील 15 हजार लिटर क्षमतेची साठवण टाकी (जलकुंभ) लोकांच्या पुढाकाराने व सहभागाने बांधण्यात आली आहे. यासाठी रोटरी क्लब ऑफ ग्रेप सिटीतर्फे दीड लाखाचे अर्थसहाय्य लाभले. या छोट्या आदिवासी वस्तीची लोकसंख्या अंदाजे 75 च्या आसपास आहे. या जलकुंभामुळे ग्रामस्थ व जनावरांना फायदा होईल.
पुण्यातील ज्ञानप्रबोधिनी संस्थेच्या ग्राम विकसन विभागातर्फे आत्तापर्यंत इगतपुरी तालुक्यात आठ, त्र्यंबकेश्वर तालुक्यात नऊ, तर पेठ तालुक्यात चौदा पाणी साठवण टाक्या गेल्या दोन वर्षांत बांधण्यात आल्या आहेत. यासाठी पर्यावरणपूरक फेरोसिमेंट तंत्रज्ञानाचा वापर करण्यात आला आहे. उन्हाळ्यातील टंचाई काळात दुर्गम व डोंगराळ भागातील आदिवासी पाड्यांना या पाणी साठवण टाक्या उपयोगी ठरत आहेत.
यावेळी रोटरी क्लब ऑफ नाशिक ग्रेप सिटीचे पदाधिकारी व सदस्यांनी महिलांसाठी पाण्याचे कष्ट कमी झाल्याबद्दल समाधान व्यक्त केले व उपलब्ध पाणी काटकसरीने व जपून वापरण्याचे ग्रामस्थांना आवाहन केले.