एका हाताने कर्जमाफी, दुसर्‍या हाताने सन्मान निधीला कात्री!

56 लाख शेतकरी ’नमो’ योजनेतून बाद होण्याची शक्यता

मुंबई : प्रतिनिधी
राज्य सरकारने शेतकर्‍यांना सरसकट कर्जमाफीचा मोठा दिलासा दिला असला तरी, आता याच निर्णयामुळे शेतकर्‍यांचा दुसरा आर्थिक लाभ हिरावला जाण्याची शक्यता आहे. वाढत्या आर्थिक बोजामुळे ‘पुण्यश्लोक अहिल्यादेवी होळकर शेतकरी कर्जमुक्ती योजने’चा लाभ घेणार्‍या सुमारे 56 लाख शेतकर्‍यांना ‘नमो शेतकरी महासन्मान निधी योजने’तून एका वर्षासाठी वगळण्याचा राज्य सरकारचा विचार सुरू आहे.
पावसाळी अधिवेशनात विरोधकांनी केलेल्या आक्रमक मागणीनंतर मुख्यमंत्री देवेंद्र फडणवीस यांना सरसकट कर्जमाफीचा निर्णय घ्यावा लागला होता. मात्र, या निर्णयामुळे तिजोरीवर पडणारा ताण कमी करण्यासाठी आता एका हाताने कर्जमुक्ती देताना दुसर्‍या हाताने हक्काचे सहा हजार रुपये रोखले जाणार असल्याने शेतकर्‍यांमध्ये अस्वस्थता निर्माण होऊ शकते.
तत्कालीन मुख्यमंत्री एकनाथ शिंदे यांनी 15 जून 2023 रोजी ‘पीएम किसान’ योजनेच्या धर्तीवर राज्यात ‘नमो शेतकरी योजना’ सुरू केली होती. याअंतर्गत पात्र शेतकर्‍यांना वर्षाला तीन हप्त्यांत एकूण सहा हजार रुपयांची रोख मदत दिली जाते. आजवर या योजनेतून राज्यातील 93 लाखांहून अधिक शेतकर्‍यांना आठ हप्त्यांमध्ये सुमारे 14,816 कोटी रुपयांचे वाटप झाले आहे. मात्र, सध्या प्रशासकीय आणि आर्थिक अडचणींमुळे 2026-27 या वर्षातील (डिसेंबर-मार्च आणि एप्रिल-जुलै) दोन हप्ते रखडले आहेत. कृषी आयुक्तालयाने या थकीत निधीच्या वितरणाचा प्रस्ताव सरकारकडे पाठवला असला तरी, कर्जमाफीच्या अतिरिक्त बोजामुळे ’नमो’ योजनेचे भवितव्य तूर्तास तरी टांगणीला लागले आहे.

Loan waivers with one hand, cuts to the honor fund with the other!