यशवंत मंडईत बहुमजली पार्किंग रखडली

पाच वेळा फेरनिविदा, ठेकेदारांची अनुत्सुकता

नाशिक : प्रतिनिधी
शहरातील रविवार कारंजावरील महापालिका मालकीची यशवंत मंंडई जमीनदोस्त करून तेथे बहुमजली पार्किंग उभारण्याचे नियोजन आहे. या पार्किंगचे बांधकाम विकासकानेच करायचे अन् त्याला तीस वर्षांच्या करारनाम्यावर द्यायची, असे नियोजन पालिकेने केले आहे. याकरिता निविदा प्रक्रिया राबविण्यात आली. परंतु, सुरुवातीपासूनच ठेकेदारांनी याकडे पाठ फिरवल्याचे दिसून आले.
विशेष म्हणजे, पाच वेळेस फेरनिविदा काढूनही त्याकडे कोणी फिरकले नसल्याचे चित्र आहे. त्यामुळे वर्षभरापूर्वी जमीनदोस्त केलेल्या यशवंत मंडईच्या जागेवरील बहुमजली पार्किंग रखडली आहे.
जीर्ण झालेल्या यशवंत मंडई इमारतीचे महापालिकेने स्ट्रक्चर ऑडिट केले असता, ती कधीही कोसळण्याचे अहवालातून समोर आले होते. त्यानंतर 2 जुलै 2025 पासून ही इमारत पाडण्यास सुरुवात करण्यात आली. खासगी भागीदारी तत्त्वावर तीस वर्षे सदर पार्किंग मक्तेदारास चालविण्यास दिली जाणार आहे.
चारचाकी वाहने लावण्यासाठी रविवार कारंजा भागात कुठेही पार्किंगची व्यवस्था नाही. परिणामी, या भागात सतत वाहतूक कोंडी होतेे. यावर उपाय म्हणून महापालिकेने बहुमजली पार्किंग उभारण्याचा निर्णय घेतला आहे. काही व्यावसायिक गाळे व वरच्या मजल्यावर पार्किंग याद़ृष्टीने नियोजन आहे. परंतु, निविदा प्रक्रिया राबवूनही मक्तेदारांचा प्रतिसाद मिळत नसल्याचे चित्र आहे. सिंहस्थ कुंभमेळ्याच्या पार्श्वभूमीवर महापालिका प्रशासनाने खर्च वाचवण्याचे धोरण अवलंबल्याचे दिसते आहे. त्यामुळे खासगी विकासकांकडून मोठ्या प्रकल्पाची कामे करून घेतली जात आहेत. याच धोरणानुसार आडगाव येथील ट्रक टर्मिनलचे विकासकाकडूनच काम करून घेतले जात आहे.

विकासकाला शिंदेसेनेचा विरोध

काही दिवसांपूर्वी शिंदेसेनेचे पदाधिकारी सचिन भोसले यांनी खासगी विकासकाच्या माध्यमातून सदर काम होता कामा नये. शासनाच्या नगरविकास खात्याने किंवा महापालिका प्रशासनाने आपल्या निधीतून हे काम करावे, अशी मागणी प्रशासनाकडे केली आहे.

Multi-level parking project at Yashwant Mandai stalled.