नाशिकचे निवासी उपजिल्हाधिकारी डोईफोडेंसह मिसाळ, नरसीकर यांची बदली

– रमेश मिसाळ हे नाशिकचे नवे पुरवठा अधिकारी…

नाशिक – (विशेष प्रतिनिधी)
महसूल विभागातील उपजिल्हाधिकारी तसेच उपविभागीय पदाच्या १८ अधिकाऱ्यांच्या बदल्यांचे आदेश निघाले आहेत. यातील आठ उपजिल्हाधिकारी यांना ‘वेटींग’ वर ठेवण्यात आले असून त्यांच्या नियुक्तीचे स्वतंत्र आदेश काढण्यात येणार आहेत.
राज्याचे उपसचिव माधव वीर यांनी उत्तर महाराष्ट्रातील नाशिक, धुळे, जळगाव, नंदुरबार, अहमदनगर येथील महसूल विभागातील उपजिल्हाधिकाऱ्यांच्या बदल्या केल्या आहेत. यामध्ये नाशिकचे पुरवठा अधिकारी अरविंद नरसीकर यांची अहमदनगरला पुनर्वसन विभागात बदली करण्यात आली आहे. त्यांच्या जागी धुळ्याचे पुनर्वसन अधिकारी रमेश मिसाळ हे आता नाशिकचे नवे पुरवठा अधिकारी असणार आहे. जयश्री माळी या अहमदनगर येथून जळगाव येथे भूसंपादन अधिकारी या पदावर जात आहेत. किरण पाटील यांची जळगाव वरून श्रीरामपूरला उपविभागीय अधिकारी या पदावर नियुक्ती करण्यात आली आहे. निफाड येथील उपविभागीय अधिकारी अर्चना पठारे यांची बदली करण्यात आली असून त्यांच्या जागी हेमांगी पाटील यांची नियुक्ती करण्यात आली आहे. जळगावचे
निवासी उपजिल्हाधिकारी राहुल पाटील यांची अहमदनगरला निवडणूक निर्णय अधिकारी म्हणून नियुक्ती करण्यात आली आहे. जितेंद्र पाटील भुसावळ येथे उपविभागीय अधिकारी या पदावर, अंमळनेरच्या उपविभागीय अधिकारी सीमा अहिरे नाशिकला भूसंपादन विभागात, जळगावचे भूसंपादन अधिकारी राजेंद्र वाघ हे नाशिकला निवासी उपजिल्हाधिकारी म्हणून, धुळ्याचे उपजिल्हाधिकारी संजय गायकवाड हे जळगावला पुरवठा अधिकारी म्हणून, महेश शेलार हे नंदुरबार वरून धुळ्याला पुरवठा अधिकारी म्हणून, नितीन गवंडे यांची धुळ्याला पुनर्वसन अधिकारी म्हणून बदली होत आहे. वासंती माळी यांची नाशिकला बदली झाली असून नफा विभागातून वनजमीन या विभागामध्ये त्यांची बदली करण्यात आली आहे. अहमदनगर, नंदुरबार येथील शाहूराज मोरे यांची बदली अहमदनगर येथे करण्यात आली आहे. नाशिकचे उपजिल्हाधिकारी भागवत डोईफोडे, उर्मिला पटेल, अनिल पवार, गणेश मिसाळ, अर्चना पठारे, सुनील सूर्यवंशी, गोविंद दणजे आणि पल्लवी निर्मळ या उपजिल्हाधिकाऱ्यांना कोणतीही नियुक्ती देण्यात आलेली नाही. त्यांना प्रतीक्षेच्या यादीमध्ये ठेवण्यात आला आहे. त्यांच्या नियुक्ती बाबतचा निर्णय हा नंतर घेण्यात येणार असल्याचे आदेशामध्ये स्पष्ट करण्यात आले आहे.