भरधाव चारचाकीची दोन दुचाकी, कारला धडक; एक जखमी, चालक फरार

सातपूर : प्रतिनिधी
सातपूर परिसरातील अशोकनगर, सावरकरनगर बसस्टॉपजवळ बुधवारी (दि. 5) रात्री सुमारे 8.30 वाजण्याच्या सुमारास भरधाव वेगाने आलेल्या अज्ञात चारचाकी वाहनाने दोन दुचाकी व एका चारचाकीला जोरदार धडक दिली. या अपघातात एक जण जखमी झाला असून, वाहनांचे मोठ्या प्रमाणात नुकसान झाले आहे. अपघातानंतर संबंधित वाहनचालक घटनास्थळी न थांबता वाहनासह पसार झाल्याने नागरिकांनी संताप व्यक्त केला. नेहमीप्रमाणे सावरकरनगर बसस्टॉप परिसरात वाहतुकीची वर्दळ सुरू असताना भरधाव वेगाने आलेल्या अज्ञात चारचाकीने प्रथम एका दुचाकीला धडक दिली. त्यानंतर वाहनावरील नियंत्रण सुटल्याने आणखी एका दुचाकीसह एका चारचाकीला जोरदार धडक बसली. या अपघातात एक जण जखमी झाला असून, स्थानिक नागरिकांनी त्याला तातडीने उपचारासाठी रुग्णालयात दाखल केले. घटनेची माहिती मिळताच पोलिसांनी घटनास्थळी धाव घेत पंचनामा केला. परिसरातील सीसीटीव्ही कॅमेर्‍यांचे
फुटेज तपासण्यात येत असून, धडक देणार्‍या वाहनाचा व चालकाचा शोध सुरू आहे. अपघातानंतर चालकाने घटनास्थळावरून पलायन केल्याने हिट अँड रनच्या अनुषंगानेही तपास सुरू करण्यात आला आहे. दरम्यान, परिसरात काही वाहनचालकांकडून भरधाव वेगाने वाहने चालविली जात असल्याने अपघातांचे प्रमाण वाढले आहे.

Speeding car rams into two two-wheelers and another car; one injured, driver flees.