एक्स्लो पॉइंटवरील वाहतूक पोलीस चौकीवर दगडफेक

आरोपींना अवघ्या 12 तासांत अटक करण्यात अंबड पोलिसांना यश

सिडको : विशेष प्रतिनिधी
अंबड औद्योगिक वसाहतीतील एक्स्लो पॉइंटवरील वाहतूक पोलीस चौकीवर दगडफेक करण्याचा प्रकार घडला. याबाबत अंबड पोलीस ठाण्यात गुन्हा दाखल करण्यात आला होता. या गुन्ह्यातील दोन अनोळखी आरोपींना अवघ्या 12 तासांत अटक करण्यात गुन्हेशाखा युनिट क्रमांक 2 ला यश आले आहे. या कारवाईत गुन्ह्यात वापरण्यात आलेली मोपेड गाडीही जप्त करण्यात आली आहे.
अंबड पोलीस ठाण्यात दाखल करण्यात आलेल्या या गुन्ह्यात मोपेडवरील दोन आरोपींचा शोध घेण्याच्या अनुषंगाने गुन्हे शाखेच्या पथकाने तपास सुरू केला. घटनास्थळावरील तसेच परिसरातील सुमारे 8 ते 10 किलोमीटरपर्यंतच्या सीसीटीव्ही फुटेजची तपासणी करण्यात आली. फुटेजमध्ये आरोपी पोलीस चौकीवर दगडफेक करून पळताना दिसले. यावरून तपासाचा महत्त्वाचा धागा मिळाला.
गोपनीय बातमीदाराकडून मिळालेल्या माहितीनुसार, आरोपी पाथर्डी फाटा ते अंबडगाव परिसरात मोपेडवर फिरत असल्याचे समजताच गुन्हे शाखेच्या पथकाने सापळा रचून दोघांना ताब्यात घेतले. चौकशीत त्यांनी आपली नावे शमसुद्दीन नसरुल्लाह शहा (वय 52, रा. चुंचाळेगाव, अंबड लिंक रोड) आणि संतोष मनिराम सरोज (वय 34, रा. संजीवनगर, अंबड लिंक रोड) अशी सांगितली.
पोलिसांनी आरोपींकडून साठ हजार रुपये किमतीची होंडा अ‍ॅक्टिव्हा (एमएच 15-एचपी 2993) जप्त केली आहे. चौकशीत दोघांनी गुन्ह्याची कबुली दिल्यानंतर त्यांना पुढील कारवाईसाठी एमआयडीसी चुंचाळे पोलीस ठाण्यात हजर करण्यात आले. ही कारवाई सपोनि हेमंत तोडकर यांच्या नेतृत्वाखाली गुन्हेशाखा युनिट 2 च्या अधिकारी व अंमलदारांनी केली. अवघ्या 12 तासांत गुन्हा उघडकीस आणल्याबद्दल पोलीस पथकाचे कौतुक करण्यात येत आहे.

Stones pelted at traffic police post at Exlow Point

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.