भारत व सेशेल्समध्ये युपीआय प्रणाली लागू

ऐतिहासिक करार : दोन्ही देशांमधील आर्थिक देवाणघेवाण सुलभ होणार

व्हिक्टोरिया/नवी दिल्ली :
भारत आणि सेशेल्स या दोन देशांमधील डिजिटल आणि आर्थिक सहकार्य अधिक दृढ करण्याच्या उद्देशाने पंतप्रधान नरेंद्र मोदी यांनी सेशेल्समध्ये भारताची ‘युनिफाइड पेमेंट्स इंटरफेस’ (यूपीआय) प्रणाली लागू करण्यासाठी एका महत्त्वपूर्ण सामंजस्य कराराची (एमओयू) घोषणा केली आहे. रविवारी पंतप्रधान मोदी आणि सेशेल्सचे राष्ट्राध्यक्ष डॉ. पॅट्रिक हर्मिनी यांच्यात झालेल्या उच्चस्तरीय चर्चेदरम्यान या करारावर स्वाक्षर्‍या करण्यात आल्या. दोन्ही देशांमधील राजनैतिक संबंधांना 50 वर्षे पूर्ण होत असल्याच्या आणि सेशेल्सच्या 50 व्या स्वातंत्र्यदिनाच्या ऐतिहासिक पार्श्वभूमीवर हा करार पार पडला असून, यामुळे दोन्ही देशांमधील आर्थिक देवाणघेवाण आणि व्यापार अधिक सुलभ होणार आहे.
या बैठकीदरम्यान पंतप्रधान मोदी यांनी हिंदी महासागराच्या सुरक्षेवर आणि समृद्धीवर भर देताना भारताच्या ‘महासागर’ दृष्टिकोनाचा पुनरुच्चार केला. त्यांनी नमूद केले की, हिंदी महासागर हे दोन्ही देशांचे सामायिक घर असून, त्याची सुरक्षा, शाश्वतता आणि विकास ही दोघांचीही संयुक्त जबाबदारी आहे. भारत आणि सेशेल्समधील भौगोलिक अंतर कमी करण्यासाठी आणि संपर्क वाढवण्यासाठी डिजिटल तंत्रज्ञान हे एक अत्यंत प्रभावी माध्यम असल्याचे मोदींनी अधोरेखित केले. यूपीआय प्रणालीच्या वापरामुळे आर्थिक सहकार्य भविष्यासाठी अधिक सक्षम होईल आणि दोन्ही देशांतील उद्योगांसाठी प्रगतीच्या नव्या संधी उपलब्ध होतील, असा विश्वास दोन्ही नेत्यांनी व्यक्त केला. डिजिटल व्यवहारांसोबतच आरोग्यसेवा, बँकिंग, कृषी आणि बाह्य अंतराळ संशोधन यांसारख्या विविध महत्त्वाच्या क्षेत्रांमध्येही दोन्ही देशांनी सामंजस्य करार केले आहेत. याशिवाय, सेशेल्सची सागरी सुरक्षा आणि विशेष आर्थिक क्षेत्राची (ईईझेड) गस्त क्षमता अधिक मजबूत करण्यासाठी भारताने ’मेक इन इंडिया’ अंतर्गत तयार केलेली अत्याधुनिक जलद गस्ती नौका, सहा रुग्णवाहिका, 10 उपयुक्तता वाहने आणि पाच लेझर-गायडेड बोटी सेशेल्सला सुपूर्द केल्या आहेत. या संरक्षण आणि तंत्रज्ञान क्षेत्रातील सर्वसमावेशक सहकार्यामुळे भारत आणि सेशेल्स या दोन्ही देशांमधील द्विपक्षीय संबंध आता नव्या उंचीवर पोहोचले आहे

सेशेल्सच्या नॅशनल असेंब्लीत भाषण

पंतप्रधान नरेंद्र मोदी यांनी सेशेल्सच्या नॅशनल असेंब्लीला (संसदेला) संबोधित करताना भारत आणि सेशेल्समधील गेल्या 50 वर्षांच्या यशस्वी वाटचालीचा गौरव करत भविष्यातील विकासाची दिशा स्पष्ट केली. सेशेल्सचे भविष्य तेथील तरुणांच्या हाती असल्याचे सांगत त्यांनी दोन्ही देशांमधील शैक्षणिक आणि व्यावसायिक सहकार्यावर विशेष भर दिला. सेशेल्सचे विद्यार्थी, व्यावसायिक, प्रशासकीय अधिकारी आणि सुरक्षा दलाचे जवान गेल्या अनेक दशकांपासून भारतात प्रशिक्षण आणि शिक्षण घेत असल्याचा सार्थ अभिमान मोदींनी व्यक्त केला.

मोदींना ’गार्जियन ऑफ द ब्लू हॉरिजन’ पुरस्कार

पंतप्रधान नरेंद्र मोदी यांच्या सेशेल्स दौर्‍यादरम्यान त्यांना सेशेल्स प्रजासत्ताकाचा अत्यंत मानाचा ’गार्जियन ऑफ द ब्लू हॉरिजन’ हा सर्वोच्च सन्मान प्रदान करण्यात आला आहे. सेशेल्सचे राष्ट्राध्यक्ष डॉ. पॅट्रिक हर्मिनी यांनी दोन्ही देशांमधील द्विपक्षीय संबंध मजबूत करण्यासाठी आणि विशेषतः हिंदी महासागर क्षेत्रातील सागरी सुरक्षा, शाश्वत विकास आणि प्रादेशिक सहकार्यासाठी पंतप्रधान मोदींनी दाखवलेल्या उत्कृष्ट नेतृत्वाची दखल घेऊन हा गौरव केला. या पुरस्काराबद्दल कृतज्ञता व्यक्त करताना पंतप्रधान मोदी यांनी हा सन्मान 140 कोटी भारतीयांचा आणि दोन्ही देशांमधील ऐतिहासिक मैत्रीचा गौरव असल्याचे म्हटले, तसेच भारताचा ’महासागर’ दृष्टिकोन हिंदी महासागर क्षेत्रातील शांतता आणि समृद्धीसाठी सदैव वचनबद्ध राहील, असा पुनरुच्चार केला.

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.