पोलीस असल्याची बतावणी करत महिलेचे दोन लाखांचे दागिने लंपास

सिडको : विशेष प्रतिनिधी
पोलीस अधिकारी असल्याची बतावणी करून तीन अनोळखी व्यक्तींनी 68 वर्षीय महिलेच्या अंगावरील दोन लाख सहा हजार रुपये किमतीचे सोन्याचे दागिने लंपास केल्याची घटना उपनगर परिसरात घडली. याप्रकरणी उपनगर पोलीस ठाण्यात तीन अनोळखी व्यक्तींविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सरला मुरलीधरन कुडीकंटकटेल (वय 68, गृहिणी) या सकाळी साडेनऊच्या सुमारास आपल्या घरासमोरून जयभवानी रोडवरील मेडिकलमध्ये जात होत्या. त्यावेळी घराबाहेरील रस्त्यावर तीन अनोळखी इसमांनी त्यांना अडवले.
आम्ही पोलीस अधिकारी आहोत, अशी बतावणी करून या तिघांनी महिलेच्या अंगावरील सोन्याचे दागिने काढून घेतले. त्यामध्ये 32 ग्रॅम वजनाच्या सोन्याच्या चार बांगड्या, किंमत एक लाख 20 हजार रुपये, तसेच 24 ग्रॅम वजनाचे सोन्याचे मंगळसूत्र, किंमत 86 हजार रुपये, अशा एकूण दोन लाख सहा हजार रुपये किमतीच्या दागिन्यांचा समावेश आहे. दागिने घेऊन तिन्ही संशयित तेथून पसार झाले.
घटनेनंतर महिलेने उपनगर पोलिसांकडे तक्रार दिली. त्यानुसार गुन्हा दाखल करण्यात आला आहे.
अनोळखी संशयितांचा शोध घेण्यासाठी पोलिसांकडून तपास सुरू आहे.
या प्रकरणाचा पुढील तपास पोलीस उपनगर पोलिस ठाण्याचे वरिष्ठ पोलीस निरीक्षक संजय पिसे यांच्या मार्गदर्शनाखाली उपनिरीक्षक प्रभाकर सोनवणे करीत आहेत.

Woman’s jewellery worth two lakh rupees stolen by someone posing as a police officer.