देवगाव येथे कर्जफेडीच्या विवंचनेतून शेतकऱ्याने संपवलं आयुष्य

लासलगाव:समीर पठाण

शेतीसाठी घेतलेल्या कर्जाची परतफेड करता येत नसल्याच्या विवंचनेतून दत्तात्रय सुखदेव निफाडे (वय ५२) यांनी राहत्या घरात गळफास घेऊन आत्महत्या केल्याची धक्कादायक घटना निफाड तालुक्यातील देवगाव येथे घडली.

याबाबत मृत दत्तात्रय निफाडे यांचा मुलगा चंद्रकांत निफाडे यांनी दिलेल्या माहितीनुसार, दत्तात्रय निफाडे यांची देवगाव शिवारात २ एकर शेती आहे. निफाडे यांनी देवगाव नागरी सहकारी पतसंस्थेकडून ४ लाख १० हजार, कॅनरा बँक निफाड शाखेतून पत्नीच्या नावे २ लाख व मुलाच्या नावे २ लाख रुपये कर्ज घेतले होते. तसेच नातेवाईक व मित्राकडून ४ लाख रुपये हातउसने घेतले होते. शेतात लागवड केलेले टोमॅटो आणि कांदा बाजारपेठेत विकून उत्पादन खर्चही निघाला नाही. त्यामुळे घेतलेले कर्ज फेडायचे कसे? या विचाराने ते काही दिवसापासून तणावात होते. त्यातूनच सोमवार दि.१६ सकाळी ११.३० सुमारास दत्तात्रय निफाडे यांनी शेतातील स्वतःच्या राहत्या घरात गळफास घेत आपली जीवनयात्रा संपवली.

घटनेची माहिती पोलीस पाटील सुनील बोचरे यांनी लासलगाव पोलीस स्टेशनला कळविली. लासलगाव पोलीस स्टेशनमध्ये आकस्मिक मृत्यूची नोंद करण्यात आली आहे. स.पो.नि.राहुल वाघ यांच्या मार्गदर्शनाखाली पोलीस उपनिरीक्षक लहानु धोक्रट, पोलीस नाईक संदिप शिंदे व औदुंबर मुरडनर अधिक तपास करीत आहे.

Devyani Sonar

देवयानी सोनार या 2018 पासून पत्रकारितेत कार्यरत आहेत. दैनिक पुढारी मधून त्यांनी पत्रकारिता सुरू केली, सध्या त्या दैनिक गांवकरी मध्ये उपसंपादक तसेच ऑनलाइन कंटेंट क्रीएटर म्हणून कार्यरत आहेत. आरोग्य, शैक्षणिक तसेच जिल्हा परिषद , सामाजिक विषयावर त्यांनी विपुल लेखन केलेले आहे. बीकॉम तसेच एम ए अर्थ शास्त्र यात पदयुत्तर पदवी मिळवली आहे. पत्रकारितेत अनेक पुरस्कार त्यांना मिळालेले आहेत.