आशियाई क्रीडा स्पर्धेत अमरावतीच्या कुमकुम मोहोडचा सुवर्णवेध

महिलांच्या ‘रिकर्व्ह टीम’ प्रकारात पहिलेे सुवर्णपदक

नवी दिल्ली : प्रतिनिधी
भारतीय तिरंदाज धीरज बोम्मादेवरा आणि कुमकुम अनिल मोहोड यांनी आशियाई क्रीडा स्पर्धेतील मिश्र रिकर्व्ह प्रकारात इतिहास रचला. रिकर्व्ह तिरंदाजीच्या महिला सांघिक स्पर्धेत ऐतिहासिक सुवर्णपदक जिंकल्यानंतर, कुमकुम मोहोडने धीरज बोम्मादेवराच्या साथीने भारताला आणखी एक पदक मिळवून दिले. विशेष बाब म्हणजे, दक्षिण कोरिया दहा वेळा ऑलिम्पिक चॅम्पियन आहे. कोरियन संघ 1978 पासून एकही अंतिम सामना हरलेला नाही. भारताच्या विजयाची शिल्पकार होती कुमकुम मोहोड, जिने अंतिम क्षणी संयम राखत अचूक नेमबाजी करून भारतासाठी सुवर्णपदक निश्चित केले.
आशियाई क्रीडा स्पर्धेत अमरावतीची सतरावर्षीय सुपुत्री कुमकुम अनिल मोहोड हिने भारतीय महिला रिकर्व्ह तिरंदाजी संघातून अप्रतिम कामगिरी करत ऐतिहासिक सुवर्णपदक पटकावले आहे. अत्यंत रोमहर्षक झालेल्या अंतिम सामन्यात भारतीय महिला रिकर्व्ह संघाने (कुमकुम मोहोड,अंकिता भकत आणि कीर्ती) जागतिक विजेत्या आणि 10 वेळा ऑलिम्पिक चॅम्पियन असलेल्या दक्षिण कोरियाचा 5-3 असा पराभव केला. शेवटच्या आणि निर्णायक क्षणी कुंकूमने अचूक 10 गुणांचा वेध घेत भारताच्या सुवर्णपदकावर शिक्कामोर्तब केले.कुंकूमच्या या ऐतिहासिक कामगिरीमुळे अमरावतीसह संपूर्ण महाराष्ट्राची मान अभिमानाने उंचावली आहे. तिचे सर्व स्तरातून कौतुक होत आहे. अशातच आज दुहेरी स्पर्धेत कुंकूम आणि धीरज ब्रह्मदेवरा यांनी सिल्वर पदक पटकावले आहे. तर आता उद्या होणार्‍या एकेरी तिरंदाजीकडे सगळ्या देशाचं लक्ष लागले आहे.
पहिले-वहिले सुवर्णपदक
आशियाई क्रीडा स्पर्धेत भारताचं नाव उंचावणारी 17 वर्षीय कुमकुम मोहोड हिने महिलांच्या ’रिकर्व्ह टीम’ प्रकारात भारताला दक्षिण कोरियावर 5-3 असा विजय मिळवून देत आशियाई क्रीडा स्पर्धेतील पहिले-वहिले सुवर्णपदक जिंकून देण्यात मोलाची भूमिका बजावली. महाराष्ट्राच्या या तिरंदाजाने दबावाखाली असताना अत्यंत महत्त्वाच्या क्षणी ’10 गुण’ (10ी) मिळवले. यात भारताचा ऐतिहासिक विजय निश्चित करणारा अंतिम बाणही समाविष्ट होता.
दक्षिण कोरियाचा संघ विजेतेपदाचा प्रबळ दावेदार म्हणून अंतिम फेरीत उतरला होता. त्यांच्या संघात विद्यमान विश्वविजेत्या खेळाडूंसह जागतिक क्रमवारीत तिसर्‍या स्थानावर असलेली कांग चे-यंग आणि ली व येजिन ओह यांचा समावेश होता. दुसरीकडे, आशियाई क्रीडा स्पर्धेतील महिलांच्या ’रिकर्व्ह टीम’ प्रकाराच्या अंतिम फेरीत भारताने यापूर्वी कधीही धडक मारली नव्हती. तरीही, भारतीय त्रिकुटाने सुरुवातीच्या दोन सेटमध्ये दक्षिण कोरियाला कडवी टक्कर दिली. त्यानंतर तिसर्‍या सेटमध्ये त्यांनी सामन्यावर आपले वर्चस्व निर्माण केले आणि चौथ्या सेटमध्ये संयम राखून विजय साकारला.
कोण आहे कुमकुम मोहोड?
महाराष्ट्रातील सतरावर्षीय कुमकुम मोहोडने जगातील सर्वोत्तम खेळाडूंसमोर अंतिम सामन्यात कोणत्याही तणावाशिवाय उत्कृष्ट कामगिरी केली. अनेक वर्षे कुमकुमने जुन्या उपकरणांच्या सहाय्याने प्रशिक्षण घेतले आणि स्पर्धांमध्ये भाग घेतला. तिचे वडील अनिल मोहोड यांनी अमरावतीमध्ये पुठ्ठ्याचे मिठाईचे बॉक्स बनवून तिचे स्वप्न पूर्ण करण्यास मदत केली. कुमकुमने 2025 मध्ये आंतरराष्ट्रीय स्तरावर पदार्पण केले आणि तेव्हापासून तिरंदाजी विश्वचषक आणि खंडीय स्पर्धांसह अनेक प्रमुख आंतरराष्ट्रीय स्पर्धांमध्ये भारताचे प्रतिनिधित्व केले आहे. कुमकुमने दोन आंतरराष्ट्रीय पदके जिंकली असून, दोन्ही सुवर्णपदके आहेत.

Amravati’s Kumkum Mohod Clinches Gold at Asian Games