‘विकसित भारता’बाबतचा विश्वास दृढ : पंतप्रधान

ग्लोबल फिनटेक फेस्टचे मुंबईत उद्घाटन; विरोधकांवर मोदींचा निशाणा

मुंबई : प्रतिनिधी
पंतप्रधान नरेंद्र मोदी यांनी मुंबईत ’ग्लोबल फिनटेक फेस्ट 2026’ च्या सातव्या पर्वाचे शानदार उद्घाटन केले. देश-विदेशातील प्रतिनिधींना संबोधित करताना ते म्हणाले की, तरुणांची जोखीम पत्करण्याची क्षमता आणि त्यांची ऊर्जा पाहून ’विकसित भारता’बाबतचा त्यांचा विश्वास अधिक दृढ होत आहे. या मंचावर आपली ही सलग तिसरी उपस्थिती (हॅट्ट्रिक) आहे. इथले चित्र पाहता, देशाच्या उज्ज्वल भविष्यासाठी आणि विकासा-साठी फिनटेक क्षेत्राचे महत्त्व स्पष्ट होते, असे त्यांनी नमूद केले.
जागतिक आव्हानांच्या पार्श्वभूमीवर भारताच्या मजबूत आर्थिक स्थितीचा उल्लेख करताना पंतप्रधान म्हणाले की, आज जग संघर्ष, तणाव आणि अनिश्चिततेच्या कठीण काळातून जात आहे. असे असूनही, एप्रिल-जून तिमाहीत भारताने नोंदवलेल्या 7.8 टक्के शानदार विकासदरामुळे जगाचा भारतावरील विश्वास वाढला आहे. त्यांनी माहिती दिली की, नुकतेच जपानच्या एका क्रेडिट रेटिंग एजन्सीने भारताचे सार्वभौम मानांकन ’ए’ श्रेणीमध्ये सुधारित केले आहे.
तब्बल तीन दशकांनंतर मिळालेली ही पावती म्हणजे भारताची पत, आर्थिक स्थिरता आणि वेगाने होत असलेल्या आर्थिक सुधारणांचाच पुरावा आहे. भारताच्या फिनटेक क्षेत्रातील यशाचे मुख्य श्रेय ’यूपीआय’ला देत पंतप्रधानांनी सांगितले की, 25 ऑगस्ट रोजी यूपीआयने आपली 10 वर्षे यशस्वीपणे पूर्ण केली आहेत. आकडेवारी देताना ते म्हणाले की, एकट्या ऑगस्ट महिन्यात यूपीआयच्या माध्यमातून 2400 कोटींहून अधिक व्यवहार झाले आहेत; म्हणजेच देशात दर 10 मिनिटांना सरासरी 50 लाखांहून अधिक व्यवहार होत आहेत. 10 वर्षांपूर्वी ज्यांना बँकिंग व्यवस्था अशक्य वाटत होती, तेच करोडो लोक आज फिनटेक प्रगतीचे मोठे वाहक बनले असून आज भारताचे यूपीआय जगातील 11 देशांमध्ये कार्यरत आहे. फिनटेक क्षेत्राची भविष्यातील दिशा ठरवताना पंतप्रधान मोदी म्हणाले की, सिंगापूरप्रमाणेच आता इतर देशांच्या पेमेंट सिस्टीमशी यूपीआयला जोडणे हे आपले पुढचे लक्ष्य असले पाहिजे. यामुळे परदेशात काम करणार्‍या भारतीयांना पैसे पाठवताना लागणार्‍या ’ट्रान्झॅक्शन कॉस्ट’मध्ये मोठी बचत होईल. यासोबतच, फिनटेक कंपन्यांनी केवळ पेमेंट्सपुरते मर्यादित न राहता क्रेडिट, विमा आणि गुंतवणूक क्षेत्रात आपली व्याप्ती वाढवण्याचे आवाहन त्यांनी केले. त्यांनी ’पीएम स्वनिधी’ योजनेचे उदाहरण दिले, ज्याने लाखो पथविक्रेत्यांना औपचारिक क्रेडिट सिस्टीमशी जोडून त्यांच्या वार्षिक उत्पन्नात 20 टक्कयांपर्यंत वाढ केली आहे.
तोतया पीएमओ अधिकारी; अखेर पोलीस कोठडीत बंद- पंतप्रधान कार्यालयाचे (पीएमओ) अधिकारी असल्याचे भासवून मुंबईतील वांद्रे-कुर्ला कॉम्प्लेक्स (बीकेसी) परिसरातील एका शॉपिंग मॉलमध्ये शस्त्रास्त्रांसह जबरदस्तीने प्रवेश करणार्‍या तीन जणांना पोलिसांनी सोमवारी संध्याकाळी अटक केली. यातील मुख्य आरोपीसोबत खार येथील आणखी एक व्यक्ती त्याचा अंगरक्षक म्हणून बंदुकीसह मॉलमध्ये शिरला होता. मंगळवारी पंतप्रधान नरेंद्र मोदी यांचा मुंबई दौरा असला तरी, आदल्या दिवशी घडलेल्या या बेकायदेशीर घुसखोरीच्या घटनेचा आणि पंतप्रधानांच्या दौर्‍याचा कोणताही संबंध नसून ही एक पूर्णपणे वेगळी घटना असल्याचे गुन्हे शाखेचे पोलीस उपायुक्त (डीसीपी) राज तिलक रोशन यांनी स्पष्ट केले आहे. या आरोपींना आता 11 सप्टेंबरपर्यंत पोलीस कोठडी सुनावण्यात आली आहे.

ठळक मुद्दे
♣ ग्लोबल फिनटेक फेस्ट 2026 : पंतप्रधान मोदींनी मुंबईत सातव्या पर्वाचे उद्घाटन केले आणि विकसित भारताचा संकल्प पुनरुच्चारित केला.
♣ जागतिक पतमानांकनात वाढ : 7.8% विकासदरासह 30 वर्षांनंतर जपानी एजन्सीद्वारे भारताचे सार्वभौम मानांकन ’ए’ श्रेणीत अपग्रेड.
♣ यूपीआयची दहा वर्षे पूर्ण : ऑगस्टमध्ये 2400 कोटी व्यवहार; भारताचे णझख आता जगातील 11 देशांमध्ये कार्यरत.
♣ फिनटेकचे पुढील लक्ष्य : परदेशी पेमेंट सिस्टिमशी जोडून व्यवहाराचा खर्च कमी करणे आणि क्रेडिट/विमा क्षेत्रापर्यंत पोहोच वाढवणे.
♣ विरोधकांवर टोला : जेन-झीशी संवाद साधताना पंतप्रधानांनी टीकाकारांना ’नाराज फुफा’ म्हटले आणि खोटे पसरवणारे प्रत्येक चौकात मिळतील, असा टोला लगावला.

युवाशक्तीने नवनिर्मितीवर लक्ष केंद्रित करावे
या कार्यक्रमादरम्यान ’जेन-झी’ पिढीशी संवाद साधताना पंतप्रधान मोदींनी राजकीय विरोधकांवरही सडकून टीका केली. विरोधकांवर थेट निशाणा साधताना पंतप्रधान मोदी म्हणाले की, कोणत्याही आधाराशिवाय केवळ टीका करत राहणे हे ’नाराज फुफा’चे (रुसलेल्या पाहुण्याचे) काम असते. त्यांनी तरुणांना सावध करत टोला लगावला की, खोटे पसरवणारे लोक तुम्हाला प्रत्येक चौकात मिळतील; परंतु भारताच्या युवाशक्तीने या सर्वांच्या वर उठून देशाचा विकास आणि नवनिर्मितीवर लक्ष केंद्रित केले पाहिजे.

Confidence in a ‘Viksit Bharat’ strengthened: Prime Minister

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.