लाडकी बहीण योजनेसाठी संकेतस्थळावर ई-केवायसी सुविधा

नाशिक : प्रतिनिधी
‘मुख्यमंत्री-माझी लाडकी बहीण’ या योजनेमध्ये पारदर्शकता येण्यासाठी व लाभार्थ्यांना नियमितपणे आर्थिक लाभ मिळावा याकरिता hptts;//ladkibahin.maharastra.gov,in या संकेतस्थळावर e KYC ची सुविधा उपलब्ध करण्यात आली आहे. ही प्रक्रिया मोबाइलवरूनही सोप्या पद्धतीने करता येईल, तसेच पुढील दोन महिन्यांत ही प्रक्रिया लाभार्थ्यांनी पूर्ण करण्याचे आवाहन महिला व बालविकास मंत्री आदिती तटकरे यांनी केले आहे. या प्रक्रियेमुळे भविष्यातील इतर शासकीय योजनांचा लाभ मिळवण्यासाठीही मदत होणार असल्याचे त्यांनी स्पष्ट केले.
राज्यातील महिलांच्या आर्थिक स्वातंत्र्यासाठी, त्यांच्या आरोग्य-पोषणात सुधारणा करण्यासाठी आणि कुटुंबातील त्यांची निर्णायक भूमिका मजबूत करण्यासाठी शासनातर्फे मुख्यमंत्री-माझी लाडकी बहीण योजना राबवली जात आहे. या योजनेच्या माध्यमातून थेट लाभ हस्तांतरण Diect Benefit Transfer द्वारे आर्थिक सहाय्य दिले जाते. महिला व बालविकास विभागाकडून e KYC माध्यमातून लाभार्थींचे आधार प्रमाणीकरण केले जाणार आहे. ही प्रक्रिया अतिशय सहज, सोपी व सुलभ असून, महिला स्वत:च्या मोबाइलवरूनही ही प्रक्रिया पूर्ण करू शकतील अशी प्रणाली विकसित करण्यात आली आहे. लाभार्थींनी गोंधळून न जाता तसेच कोणीही आर्थिक मागणी करीत असेल त्यास बळी पडू नये, असे आवाहनही मंत्री आदिती तटकरे यांनी केले आहे.
यासाठी पुढील प्रक्रिया आहे –  या संकेतस्थळाला भेट द्यावी. मुखपृष्ठावर असलेल्या e KYC बॅनरवर क्लिक केल्यावर e KYC फॉर्म उघडेल.
या फॉर्ममध्ये लाभार्थ्याने आपला आधार क्रमांक आणि पडताळणी संकेतांक  Captcha code  नमूद करून, आधार प्रमाणीकरणासाठी संमती देत send OTP  या बटणावर क्लिक करावे. त्यानंतर लाभार्थ्याच्या आधार लिंक मोबाइल क्रमांकावर OTP येईल. हा OTP टाकून Submit  बटणावर क्लिक करावे.
यानंतर प्रणाली तपासेल की लाभार्थ्याची KYC आधीच पूर्ण झाली आहे की नाही.
जर आधीच पूर्ण झाली असेल, तर e KYC आधीच पूर्ण झाली आहे असा संदेश दिसेल.
जर पूर्ण झाली नसेल, तर आधार क्रमांक मुख्यमंत्री माझी लाडकी बहीण योजनेच्या पात्र यादीत आहे की नाही हे तपासले जाईल. जर आधार क्रमांक पात्र यादीत असेल, तर पुढील टप्प्याला जाता येईल. यानंतर लाभार्थ्याने पती किंवा वडिलांचा आधार क्रमांक तसेच पडताळणी संकेतांक Captcha code नमूद करावा.