स्थायी समिती सभापतिपदाची आज निवड

मच्छिंद्र सानप यांची निवड निश्चित

नाशिक : प्रतिनिधी
नाशिक महापालिकेची अर्थवाहिनी असलेल्या स्थायी समिती सभापतिपदासाठी आज, बुधवारी (दि.25) निवडप्रक्रिया होणार आहे. भाजपने मच्छिंद्र सानप यांना उमेदवारी जाहीर केली आहे. भाजपकडे स्थायी समितीत स्पष्ट बहुमत असल्याने बुधवारच्या निवडणुकीची केवळ औपचारिकता बाकी आहे. राष्ट्रवादी काँग्रेसचा एकमेव स्थायी सदस्य असून, त्या मुकेश शहाणे यांनीही अर्ज भरला आहे. ते माघार घेण्याची शक्यता आहे.
विभागीय आयुक्त डॉ. प्रवीण गेडाम यांनी निवडणुकीचा कार्यक्रम जाहीर केल्यानुसार पीठासीन अधिकारी म्हणून जिल्हाधिकारी आयुष प्रसाद राहणार आहेत. स्थायी समितीत भाजपकडे स्पष्ट बहुमत असल्याने सभापती भाजपचाच होणार आहे. दरम्यान, सभापतिपदासाठी कोणाला संधी द्यायची यावरून भाजपमध्ये काही दिवसांपासून मच्छिंद्र सानप, माधुरी बोलकर, दीपाली कुलकर्णी यांची नावे चर्चेत होती. अखेर सानप यांच्या नावावर सोमवारी (दि. 23) शिक्कामोर्तब करण्यात आले. तब्बल पावणेचार वर्षांनंतर महापालिकेची निवडणूक पार पडल्यानंतर गेल्या 6 फेब्रुवारी रोजी महापौर, उपमहापौर पदाची निवडणूक पार पडली. नंतर स्थायी समिती सदस्य नियुक्तीनंतर सभापती पदाचे वेध लागले होते. आज, बुधवारी स्थायी समिती सभापतींची निवड केली जाणार आहे.
भाजपने आपल्यासह शिंदेसेनेच्या स्थायी सदस्यांना सहलीला नेले आहे. बुधवारी सकाळी स्थायी सभागृहात निवडणूक प्रक्रिया पार पडणार आहे. गेल्या सोमवारी (दि.16) महापौर हिमगौरी आहेर-आडके व उपमहापौर विलास शिंदे यांच्या उपस्थितीत झालेल्या विशेष महासभेत स्थायी समितीच्या 16 सदस्यांची निवड करण्यात आली. महापालिका निवडणूक निकालानंतर पक्षांच्या गटनोंदणीनंतर विविध पक्षांचे तौलनिक संख्याबळ निश्चित झाले होते. त्यानंतर विविध पक्षांच्या गटनेत्यांकडून स्थायी समिती सदस्य नियुक्तीसाठी बंद लखोट्यात नावे महापौरांकडे सादर करण्यात आली होती. गटनेत्यांकडून प्राप्त पत्रांचे वाचन नगरसचिवांकडून महासभेत करण्यात आले. त्यानंतर महापौर आहेर-आडके यांनी स्थायी समितीच्या 16 सदस्यांची नावे घोषित केली. त्यात भाजपचे नऊ, शिवसेना शिंदे गटाचे चार, शिवसेना उबाठाचे दोन तर राष्ट्रवादी काँग्रेसचा एक सदस्य निवडला होता. नंतर नगरसचिव विभागाने आयुक्तांमार्फत सभापती निवडीसाठी विभागीय आयुक्तांकडे प्रस्ताव सादर केला. विभागीय आयुक्त डॉ. गेडाम यांनी आज, बुधवारी (दि. 25) सकाळी 11 वाजता सभापती निवडीसाठी विशेष महासभा बोलावली आहे.

Election of Standing Committee Chairman today

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.