एमपीएससी विद्यार्थ्यांचा मोर्चा

आयोगाच्या अध्यक्षांनी राजीनामा देण्याची मागणी

पुणे/कोल्हापूर : प्रतिनिधी
महाराष्ट्र लोकसेवा आयोग (एमपीएससी) परीक्षेची तयारी करणार्‍या हजारो विद्यार्थ्यांनी नुकत्याच झालेल्या औषध निरीक्षक (ड्रग इन्स्पेक्टर) परीक्षेतील कथित पेपरफुटी आणि इतर अनियमिततेविरोधात सोमवारी, पुणे आणि कोल्हापुरात आक्रोश मोर्चा काढला. पुण्यात हा मोर्चा ओंकारेश्वर मंदिराजवळून सुरू होऊन जिल्हाधिकारी कार्यालयापर्यंत काढण्यात आला. या मोर्चात विद्यार्थी आणि नोकरीच्या प्रतीक्षेत असलेल्या उमेदवारांनी मोठ्या संख्येने सहभाग घेत एमपीएससीच्या कारभारावर तीव्र असंतोष व्यक्त केला. आयोगाचे अध्यक्ष विवेक भीमनवार यांच्या राजीनाम्याची आणि संपूर्ण परीक्षा प्रक्रियेत पारदर्शकता आणण्याची मागणी आंदोलकांनी प्रामुख्याने केली आहे.

या आंदोलनातून एमपीएससी प्रशासनातील गोंधळ आणि त्यामुळे विद्यार्थ्यांच्या भवितव्याशी होणारा खेळ यावर प्रकाश टाकण्यात आला. परीक्षांमधील पेपरफुटी, निकाल लावण्यास होणारा विलंब आणि अभ्यासक्रमातील वारंवार होणारे बदल याबद्दल विद्यार्थ्यांनी उद्वेग व्यक्त केला. या सर्व प्रक्रियेतील अनियमितता दूर करण्यासाठी कठोर उपाययोजना राबविण्याची आणि दोषींवर कडक कारवाई करण्याची मागणी त्यांनी केली.
राष्ट्रवादी काँग्रेस (शरदचंद्र पवार) पक्षाच्या नेत्या आणि खासदार सुप्रिया सुळे आणि आमदार रोहित पवार यांनी या मोर्चात प्रत्यक्ष सहभाग नोंदवून विद्यार्थ्यांच्या पाठीशी उभे राहण्याचा निर्णय घेतला. याशिवाय, शिवसेना (ठाकरे गट), काँग्रेस आणि इतर सामाजिक संघटनांनीही या आंदोलनाला आपला पाठिंबा दर्शवला आहे. मोर्चात सहभागी झाल्यानंतर सुप्रिया सुळे आणि रोहित पवार यांनी राज्य सरकारवर कडक शब्दांत ताशेरे ओढले. मुले शिक्षण सोडून रस्त्यावर उतरत आहेत, हे सरकारचे मोठे अपयश आहे, असे सुप्रिया सुळे म्हणाल्या. त्यांनी सरकारला आवाहन केले की, एखादा जबाबदार प्रतिनिधी पाठवून विद्यार्थ्यांशी तातडीने चर्चा करावी आणि तोडगा काढावा. रोहित पवार यांनी एमपीएससी अध्यक्षांच्या राजीनाम्याच्या मागणीला पाठिंबा दिला आणि त्यांच्या जागी स्वच्छ प्रतिमेच्या अधिकार्‍याची नियुक्ती करण्याची मागणी केली. ते म्हणाले की, हा भ्रष्टाचार सरकारच्या वरदहस्ताशिवाय होऊ शकत नाही, त्यामुळे याची सखोल चौकशी होणे गरजेचे आहे.

एमपीएससी अध्यक्षांचे आरोपांवर स्पष्टीकरण
कथित पेपरफुटी प्रकरणी वाढत्या विरोधानंतर आणि राजीनाम्याच्या मागणीनंतर, आयोगाचे अध्यक्ष विवेक भीमनवार यांनी स्पष्टीकरण दिले आहे. भीमनवार यांनी स्पष्ट केले की, प्रश्नपत्रिका फुटीची घटना जानेवारी 2026 मधील आहे, तर त्यांनी स्वतः 18 फेब्रुवारीला नियुक्ती होऊन 3 मार्च 2026 रोजी अध्यक्षपदाचा कार्यभार स्वीकारला होता. त्यामुळे त्यांच्या कार्यकाळापूर्वी घडलेल्या घटनेवरून राजीनामा मागणे चुकीचे आहे. पेपरफुटीत आपल्या सहभागाचे पुरावे समोर आल्यास तत्काळ राजीनामा देऊ. आपण एक क्षणही पदावर राहणार नाही, अशी प्रतिक्रियाही भीमनवार यांनी दिली आहे.

MPSC students’ protest march

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.