90 हजारांच्या शाळेच्या ड्रेसची चोरी; अज्ञाताविरुद्ध गुन्हा दाखल

सिडको : विशेष प्रतिनिधी
शाळेच्या विद्यार्थ्यांसाठी तयार आलेले सुमारे 90 हजार रुपये किमतीचे ड्रेस चोरट्याने चोरून नेल्याची घटना उंटवाडी येथील स्वामीकृपा रेसिडेन्सी परिसरात घडली आहे. या चोरीमुळे शाळा व्यवस्थापनासह संबंधित एजन्सीत खळबळ उडाली आहे.
पोलिसांकडून मिळालेल्या माहितीनुसार, फिर्यादी शरद गंगाराम ठाकरे (रा. जगतापनगर, उंटवाडी) हे एज्युकेशन कौन्सिलर असून, त्यांच्या पत्नीच्या नावावर एसएसटी एन्टरप्रायजेस ही फर्म नोंदणीकृत आहे. सदर फर्मला निफाड तालुक्यातील खेरवाडी येथील पीएमश्री जिल्हा परिषद शाळेकडून विद्यार्थ्यांसाठी युनिफॉर्मची ऑर्डर मिळाली होती.
एकूण 242 विद्यार्थ्यांसाठी टी-शटर्र् व पँट असे 90 हजार 147 रुपये किमतीचे कपडे सफेद रंगाच्या तीन गोण्यांत भरून ठेवण्यात आले होते. हे साहित्य स्वामीकृपा रेसिडेन्सीच्या पार्किंगमध्ये असलेल्या स्टोअररूममध्ये ठेवण्यात आले होते. दरम्यान, 23 मे ते 4 जून 2025 या कालावधीत मध्यरात्रीच्या सुमारास चोरट्याने या गोण्या चोरून नेल्या.
याप्रकरणी अंबड पोलीस ठाण्यात चोरट्याविरोधात गुन्हा दाखल करण्यात आला आहे. पोलीस हवालदार संगम तपास करत आहेत.