चांदवडला ट्रक उलटून मायलेकांसह तिघांचा मृत्यू

चांदवड : वार्ताहर
येथील चांदवड-मनमाड रस्त्यावर बुधवारी (दि. 14) सिमेंटच्या विटा वाहून नेणार्‍या ट्रकचा भीषण अपघात होऊन एकाच कुटुंबातील मायलेकांचा करुण अंत झाला. या काळजाचा थरकाप उडवणार्‍या घटनेत आईसह तिच्या दोन चिमुकल्यांचा सिमेंटच्या अवजड विटांखाली दबून जागीच मृत्यू झाला. या हृदयद्रावक अपघातामुळे संपूर्ण परिसरात मोठी शोककळा पसरली आहे. मध्य प्रदेशातून रोजगारासाठी आलेल्या एका मजूर कुटुंबावर दुःखाचा डोंगर कोसळला आहे.
या भीषण अपघातात रोमिता राजेश सोळंकी (वय 25), रियान राजेश सोळंकी (वय 18 महिने) आणि दीपक राजेश सोळंकी (वय 4 वर्षे) या तिघांचा जागीच मृत्यू झाला. याबाबत मिळालेली अधिक माहिती अशी की, सिमेंटचे ब्लॉक (विटा) घेऊन एक ट्रक मनमाडकडून चांदवडच्या दिशेने जात होता. यावेळी चालकाचे ट्रकवरील नियंत्रण सुटल्याने हा ट्रक रस्त्यावरच पलटी झाला. ट्रकमध्ये बसलेले मजूर कुटुंब सिमेंटच्या शेकडो विटांखाली गाडले गेले. हा अपघात इतका भीषण होता की, रोमिता सोळंकी आणि त्यांच्या दोन लहान मुलांना सावरण्याची संधीही मिळाली नाही. या अपघातात अन्य चार जण गंभीर जखमी झाले असून, त्यांची नावे रंजित मोठा सोळंकी (वय 19), राजेश हरसिंग सोळंकी (वय 24), साररी निबू सोळंकी (वय 22) आणि परवेश कल्याणसिंग यादव (वय 22) अशी आहेत. या घटनेची माहिती मिळताच चांदवड पोलीस ठाण्याचे पोलीस निरीक्षक कैलास वाघ यांनी आपल्या पथकासह तातडीने घटनास्थळी धाव घेतली. पोलिसांनी स्थानिक नागरिकांच्या मदतीने युद्धपातळीवर बचावकार्य राबवून जखमींना बाहेर काढले आणि उपचारासाठी चांदवड येथील उपजिल्हा रुग्णालयात दाखल केले.

Three including Mylek die as truck overturns in Chandwad