फ्लॅट विक्रीच्या व्यवहारात 60 लाखांची फसवणूक

मुंबई नाका पोलीस ठाण्यात गुन्हा दाखल

सिडको : विशेष प्रतिनिधी
फ्लॅट विक्रीच्या व्यवहारात 85 लाखांहून अधिक रकमेपैकी केवळ अंशतः पैसे परत करून उर्वरित रक्कम स्वतःच्या फायद्यासाठी वापरल्याप्रकरणी मुंबई नाका पोलीस ठाण्यात फसवणुकीचा गुन्हा दाखल करण्यात आला आहे. याप्रकरणी फिर्यादी अनिल रामचंद्र हरिनामे (वय 71, रा. 7, अनि-अभि सोसायटी, रामदास स्वामीनगर, टाकळी रोड, उपनगर, नाशिक) यांनी तक्रार दिली आहे.
पोलिसांनी दिलेल्या माहितीनुसार, आरोपी प्रमोद विश्वनाथ दोडके (रा. सृष्टी कॉम्प्लेक्स, मीरा रोड, ठाणे) याने फिर्यादी यांचे फ्लॅट क्र. 201, 502 आणि 504 हे 2018 साली एकूण 85 लाख 83 हजार रुपये किमतीस विक्रीसाठी घेतले. परंतु व्यवहारानंतर परस्परपणे हे फ्लॅट विक्री करून त्यातील 25 लाख 75 हजार रुपये फक्त परत दिले. उर्वरित 60 लाख 8 लाख रुपये परत न करता स्वतःच्या फायद्यासाठी वापरून फिर्यादीची फसवणूक करण्यात आली.
हा प्रकार दि. 1 जानेवारी 2018 ते 31 डिसेंबर 2022 दरम्यान महाराष्ट्र बँक, शाखा द्वारका, खरबंदा पार्क, नाशिक येथे घडला. याप्रकरणी मुंबई नाका पोलीस ठाण्यात गुन्हा दाखल करण्यात आला आहे. या प्रकरणाचा तपास वरिष्ठ पोलीस निरीक्षक नरूटे व सहाय्यक पोलीस निरीक्षक वाघ करत आहेत.