जांभूळपाड्यात स्मशानभूमीविना उघड्यावर होतोय अंत्यविधी

रस्त्याचाही बोजवारा, लोकप्रतिनिधींचे दुर्लक्ष

दिंडोरी ः प्रतिनिधी
सुरगाणा तालुक्यातील ग्रामपंचायत रोंघाने पैकी जांभूळपाडा गावातील नागरिकांना अजूनही स्मशानभूमीविना उघड्यावर अंत्यविधी करावा लागत आहे. येथील नागरिकांनी वेळोवेळी स्मशानभूमी व रस्त्याची मागणी करूनही अद्याप शासन किंवा लोकप्रतिनिधींनी लक्ष दिलेले नाही.
ऐन पावसाळ्यात गावात कोणी मृत झाले, तर त्याचे उघड्यावर अंत्यसंस्कार करावे लागत आहेत. याबाबत जांभूळपाडा येथील उपसरपंच जयवंती वार्डे, ग्रामपंचायत सदस्य मुरलीधर घांगळे यांच्यासह ज्ञानेश्वर वार्डे, एकनाथ घांगळे, वामन भोये, नामदेव हाडस, युवराज जाधव, नंदू भोये आदींंनी स्मशानभूमी शेड व रस्त्यासाठी लोकप्रतिनिधींकडे मागणी केली आहे.