जरांगे मुंबईतील आंदोलनावर ठाम

पोलिसांनी परवानगी नाकारली
मुंबई : प्रतिनिधी
मराठा आरक्षणाच्या मागणीसाठी 15 सप्टेंबर रोजी मुंबईकडे धडक मारण्याच्या तयारीत असलेल्या मनोज जरांगे पाटील यांना मोठा धक्का बसला आहे. आझाद मैदानावर आंदोलन करण्यासाठी जरांगे पाटील यांच्या वतीने पोलिसांकडे रीतसर परवानगी मागण्यात आली होती. मात्र, आझाद मैदान पोलीस ठाण्याचे वरिष्ठ पोलीस निरीक्षक राजू बिडकर यांनी या आंदोलनास स्पष्ट शब्दांत परवानगी नाकारली आहे. आंदोलनामुळे दक्षिण मुंबई परिसरातील शाळा, रुग्णालये, व्यवसाय, न्यायालये, सार्वजनिक वाहतूक आणि सार्वजनिक आरोग्य यांसारख्या बाबी बाधित होऊन सार्वजनिक सुव्यवस्थेचा गंभीर प्रश्न निर्माण होऊ शकतो, असे कारण देत पोलिसांनी ही परवानगी नाकारली आहे. पोलिसांनी परवानगी नाकारली असली तरी, आपण कोणत्याही परिस्थितीत आंदोलन करणारच, अशी ठाम भूमिका मनोज जरांगे पाटील यांनी घेतली आहे. ‘न्यायदेवता आपल्या बाजूने आहे, त्यामुळे परवानगी मिळाली नाही तरी आंदोलन होणारच’, असे त्यांनी आधीच स्पष्ट केले होते. सगेसोयरे अधिसूचनेची अंमलबजावणी, निवृत्त न्यायमूर्ती शिंदे समितीने शोधलेल्या 58 लाख कुणबी नोंदींच्या आधारे सर्वांना तात्काळ कुणबी प्रमाणपत्र वाटप, गॅझेटियरची अंमलबजावणी, मराठा विद्यार्थ्यांच्या नियुक्त्या आणि आंदोलकांवरील गुन्हे मागे घेणे, अशा त्यांच्या प्रमुख मागण्या आहेत. या मागण्या मान्य झाल्याशिवाय आपण मागे हटणार नसल्याचा इशारा त्यांनी दिला आहे.

Jarange firm on Mumbai protest