प्रतिबंधित गुटखा, तंबाखूची वाहतूक करणारा ट्रक पकडला

12 लाख 85 हजार रुपयांचा मुद्देमाल जप्त

सिडको : प्रतिनिधी
महाराष्ट्रात प्रतिबंधित असलेला गुटखा आणि तंबाखूजन्य पदार्थ विक्रीच्या उद्देशाने वाहतूक करणारा आयशर ट्रक एमआयडीसी पोलिसांनी गरवारे पॉइंट परिसरात पकडला.
या कारवाईत विविध कंपन्यांचा पानमसाला व तंबाखू तसेच आयशर ट्रक असा एकूण 12 लाख 85 हजार 662 रुपयांचा मुद्देमाल जप्त करण्यात आला. ही कारवाई गरवारे पॉइंट, अंबड, नाशिक येथे करण्यात आली. पोलिसांनी चेतन दत्तात्रय पोमण (वय 34, रा. सारूळा, ता. भोर, जि. पुणे) याला ताब्यात घेतले आहे. या प्रकरणात वसीमाण पठाण (रा. मुंबई) याचाही आरोपी म्हणून उल्लेख करण्यात आला आहे. पोमण हा आयशर ट्रक (एमएच 17 एजी 9359) मधून महाराष्ट्र शासनाने प्रतिबंधित केलेले पानमसाला व तंबाखूजन्य पदार्थ घेऊन जात होता. हे पदार्थ विक्रीच्या उद्देशाने बाळगून वाहतूक करत असताना पोलिसांच्या पथकाने त्याला पकडले. जप्त करण्यात आलेल्या मुद्देमालात विमल पानमसाल्याचे 315 पुडे, व्ही-1 बिग तंबाखूचे 315 पुडे, राजश्री पानमसाल्याचे 208 पुडे, तसेच अन्य तंबाखूजन्य पदार्थांचा समावेश आहे. या पदार्थांची एकूण किंमत 2 लाख 85 हजार 662 रुपये असून, सुमारे 10 लाख रुपये किमतीचा आयशर ट्रकही जप्त करण्यात आला आहे. या प्रकरणी एमआयडीसी पोलिस ठाण्यात गुन्हा दाखल करण्यात आला आहे.

Truck transporting banned gutkha and tobacco seized.